៦.ចុល្លកាលមហាកាលវត្ថុ
សុភានុបស្សឹ វិហរន្តន្តិ ឥមំ ធម្មទេសនំ សត្ថា សេតព្យនគរំ ឧបនិស្សាយ សីសបាវនេ វិហរន្តោ ចុល្លកាលមហាកាលេ អារព្ភ កថេសិ ។សេតព្យនគរវាសិនោ ហិ ចុល្លកាលោ មជ្ឈិមកាលោ មហាកាលោ ចាតិ តយោ ភាតរោ កុដុម្ពិកា ។ តេសុ ជេដ្ឋកនិដ្ឋា ទិសាសុ វិចរិត្វា បញ្ចហិ សកដសតេហិ ភណ្ឌំ អាហរន្តិ ។ មជ្ឈិមកាលោ អាភតំ វិក្កីណាតិ ។ អថេកស្មឹ សមយេ តេ ឧភោបិ ភាតរោ បញ្ចហិ សកដសតេហិ នានាភណ្ឌំ គហេត្វា សាវត្ថឹ គន្ត្វា សាវត្ថិយា ច ជេតវនស្ស ច អន្តរេ សកដានិ មោចយឹសុ ។ តេសុ មហាកាលោ សាយណ្ហសមយេ មាលាគន្ធាទិហត្ថេ សាវត្ថីវាសិនោ អរិយសាវកេ ធម្មស្សវនាយ គច្ឆន្តេ ទិស្វា កុហឹ ឥមេ គច្ឆន្តីតិ បុច្ឆិត្វា តមត្ថំ សុត្វា អហំបិ គមិស្សាមីតិ ចិន្តេត្វា កនិដ្ឋំ អាមន្តេត្វា តាត សកដេសុ អប្បមត្តោ ហោហិ អហំបិ ធម្មំ សោតុំ គមិស្សាមីតិ វត្វា គន្ត្វា តថាគតំ វន្ទិត្វា បរិសបរិយន្តេ និសីទិ ។ សត្ថា តំទិវសំ តស្ស អជ្ឈាសយេន អនុបុព្វីកថំ កថេន្តោ ទុក្ខក្ខន្ធសុត្តាទិវសេន អនេកបរិយាយេន កាមានំ អាទីនវំ ឱការំ សង្កិលេសញ្ច កថេសិ ។ តំ សុត្វា មហាកាលោ សព្វំ កិរ បហាយ គន្តព្វំ បរលោកំ គច្ឆន្តំ នេវ ភោគា ន ញាតយោ អនុគច្ឆន្តិ កឹ មេ ឃរាវាសេន បព្វជិស្សាមីតិ ចិន្តេត្វា មហាជនេ វន្ទិត្វា បក្កន្តេ សត្ថារំ បព្វជ្ជំ យាចិត្វា សត្ថារា នត្ថិ តេ កោចិ អបលោកេតព្វោតិ វុត្តេ កនិដ្ឋោ មេ អត្ថិ ភន្តេតិ វត្វា តេនហិ អបលោកេហិ នន្តិ វុត្តេ សាធុ ភន្តេតិ អាគន្ត្វា កនិដ្ឋំ ឯតទវោច តាត ឥមំ សព្វំ សាបតេយ្យំ បដិបជ្ជាតិ ។ តុម្ហេ បន ភាតិកាតិ ។ អហំ សត្ថុ សន្តិកេ បព្វជិស្សាមីតិ ។ សោ តំ នានប្បការេហិ យាចិត្វា និវត្តេតុំ អសក្កោន្តោ សាធុ សាមិ យថាជ្ឈាសយំ ករោថាតិ អាហ ។ មហាកាលោ គន្ត្វា សត្ថុ សន្តិកេ បព្វជិ ។ អហំ ភាតិកំ គហេត្វាវ ឧប្បព្វជិស្សាមីតិ ចុល្លកាលោបិ បព្វជិ ។ អបរភាគេ មហាកាលោ ឧបសម្បទំ លភិត្វា សត្ថារំ ឧបសង្កមិត្វា សាសនេ ធុរានិ បុច្ឆិត្វា សត្ថារា ទ្វីសុ ធុរេសុ កថិតេសុ អហំ ភន្តេ មហល្លកកាលេ បព្វជិតត្តា គន្ថធុរំ បូរេតុំ ន សក្ខិស្សាមិ វិបស្សនាធុរំ បន បូរេស្សាមីតិ យាវ អរហត្តា សោសានិកធុតង្គំ កថាបេត្វា បឋមយាមាតិក្កមេ សព្វេសុ និទ្ទំ ឱក្កន្តេសុ សុសានំ គន្ត្វា បច្ចូសកាលេ សព្វេសុ អនុដ្ឋិតេសុយេវ វិហារំ អាគច្ឆតិ ។
អថេកា សុសានគោបិកា កាលី នាម ឆវឌាហិកា ថេរស្ស ឋិតដ្ឋានញ្ច និសីទនដ្ឋានញ្ច ចង្កមនដ្ឋានញ្ច ទិស្វា កោ នុ ខោ ឥធាគច្ឆតិ បរិគ្គណ្ហិស្សាមិ នន្តិ បរិគ្គណ្ហិតុំ អសក្កោន្តី ឯកទិវសំ សុសានកុដិកាយ ទីបំ ជាលេត្វា បុត្តធីតរោ អាទាយ គន្ត្វា ឯកមន្តេ និលីនា មជ្ឈិមយាមេ ថេរំ អាគច្ឆន្តំ ទិស្វា គន្ត្វា វន្ទិត្វា អយ្យោ នោ ភន្តេ ឥមស្មឹ ឋានេ វិហរតីតិ អាហ ។ អាម ឧបាសិកេតិ ។ ភន្តេ សុសានេ វិហរន្តេហិ នាម វត្តំ ឧគ្គណ្ហិតុំ វដ្ដតីតិ ។ ថេរោ កឹ បន មយំ តយា កថិតវត្តេ វត្តិស្សាមាតិ អវត្វា កឹ កាតុំ វដ្ដតិ ឧបាសិកេតិ អាហ ។ ភន្តេ សោសានិកេហិ នាម សុសានេ វសនភាវោ សុសានគោបកានំ វិហារេ មហាថេរស្ស គាមភោជកស្ស ច កថេតុំ វដ្ដតីតិ ។ កឹការណាតិ ។ កតកម្មា ចោរា សាមិកេហិ បទានុបទំ អនុពន្ធន្តា សុសានេ ភណ្ឌិកំ ឆឌ្ឌេត្វា បលាយន្តិ អថ មនុស្សា សោសានិកានំ បរិបន្ថំ ករោន្តិ ឯតេសំ បន កថិតេ មយំ ឥមស្ស ភទ្ទន្តស្ស ឯត្តកន្នាម កាលំ ឯត្ថ វសនភាវំ ជានាម អចោរោ ឯសោតិ ឧបទ្ទវំ និវារេន្តិ តស្មា ឯតេសំ កថេតុំ វដ្ដតីតិ ។ អញ្ញំ កឹ កាតព្វន្តិ ។ ភន្តេ សុសានេ វសន្តេន នាម អយ្យេន មច្ឆមំសបិដ្ឋតិលគុឡាទីនិ វជ្ជេតព្វានិ ទិវា ន និទ្ទាយិតព្វំ អកុសីតេន ភវិតព្វំ អារទ្ធវិរិយេន អសឋេន អមាយាវិនា ហុត្វា កល្យាណជ្ឈាសយេន ភវិតព្វំ សាយំ សព្វេសុ សុត្តេសុ វិហារតោ អាគន្តព្វំ បច្ចូសកាលេ សព្វេសុ អនុដ្ឋិតេសុយេវ វិហារំ គន្តព្វំ សចេ ភន្តេ អយ្យោ ឥមស្មឹ ឋានេ ឯវំ វិហរន្តោ បព្វជិតកិច្ចំ មត្ថកំ បាបេតុំ សក្ខិស្សតិ សចេ មតសរីរំ អានេត្វា ឆឌ្ឌេន្តិ កម្ពលកូដាគារំ អារោបេត្វា គន្ធមាលាទីហិ សក្ការំ កត្វា សរីរកិច្ចំ ករិស្សាមិ នោ ចេ សក្ខិស្សតិ ចិតកំ អារោបេត្វា អគ្គឹ ជាលេត្វា សង្កុនា អាកឌ្ឍិត្វា ពហិ ឋបេត្វា ផរសុនា កោដ្ដេត្វា ខណ្ឌាខណ្ឌិកំ ឆិន្ទិត្វា អគ្គិម្ហិ បក្ខិបិត្វា តុយ្ហំ ទស្សេត្វា ឈាបេស្សាមីតិ ។ អថ នំ ថេរោ សាធុ ភទ្ទេ ឯកំ បន រូបារម្មណំ ទិស្វា មយ្ហំ កថេហីតិ អាហ ។ សា សាធូតិ បច្ចស្សោសិ ។ ថេរោ យថាជ្ឈាសយេន សុសានេ សមណធម្មំ ករោតិ ។ ចុល្លកាលត្ថេរោ បន ឧដ្ឋាយ សមុដ្ឋាយ ឃរាវាសំ ចិន្តេតិ បុត្តទារំ អនុស្សរតិ អយំ មេ ភាតិកោ អតិភារិយំ កម្មំ ករោតីតិ ចិន្តេសិ ។
អថេកា កុលធីតា តំមុហុត្តំ សមុដ្ឋិតេន ព្យាធិនា សាយណ្ហសមយេ អមិលាតា អកិលន្តា កាលមកាសិ ។ តមេនំ ញាតយោ ទារុតេលាទីហិ សទ្ធឹ សាយំ សុសានំ នេត្វា សុសានគោបិកាយ ឥមំ ឈាបេហីតិ ភតឹ ទត្វា និយ្យាទេត្វា បក្កមឹសុ ។ សា តស្សា បារុបនវត្ថំ អបនេត្វា តំ មុហុត្តមតំ បណីតប្បណីតំ សុវណ្ណវណ្ណំ សរីរំ ទិស្វា ឥមំ អយ្យស្ស ទស្សេតុំ បដិរូបំ អារម្មណន្តិ ចិន្តេត្វា គន្ត្វា ថេរំ វន្ទិត្វា ឯវរូបំ នាម ភន្តេ អារម្មណំ អត្ថិ ឱលោកេយ្យាថាតិ អាហ ។ ថេរោ សាធូតិ គន្ត្វា បារុបនវត្ថំ នីហរាបេត្វា បាទតលតោ យាវ កេសគ្គា ឱលោកេត្វា អតិបណីតមេតំ រូបំ សុវណ្ណវណ្ណំ អគ្គិម្ហិ នំ បក្ខិបិត្វា មហាជាលាហិ គហិតកាលេ មយ្ហំ អារោចេយ្យាសីតិ វត្វា សកដ្ឋានមេវ គន្ត្វា និសីទិ ។ សា តថា កត្វា ថេរស្ស អារោចេសិ ។ ថេរោ គន្ត្វា ឱលោកេសិ ។ ជាលាយ បហដបហដដ្ឋានេ កវរគាវី វិយ សរីរវណ្ណំ អហោសិ ។ បាទា នមិត្វា ឱលម្ពឹសុ ហត្ថា បដិកុជ្ជឹសុ លលាដំ និច្ចម្មំ អហោសិ ។ ថេរោ ឥទំ សរីរំ ឥទានេវ ឱលោកេន្តានំ អបរិយន្តីករំ ហុត្វា ឥទានេវ ខយប្បត្តំ វយប្បត្តន្តិ រត្តិដ្ឋានំ គន្ត្វា និសីទិត្វា ខយវយំ សម្បស្សមានោ
អនិច្ចា វត សង្ខារា ឧប្បាទវយធម្មិនោ
ឧប្បជ្ជិត្វា និរុជ្ឈន្តិ តេសំ វូបសមោ សុខោតិ
គាថំ វត្វា វិបស្សនំ វឌ្ឍេត្វា សហ បដិសម្ភិទាហិ អរហត្តំ បាបុណិ ។
តស្មឹ អរហត្តំ បត្តេ សត្ថា ភិក្ខុសង្ឃបរិវុតោ ចារិកញ្ចរមានោ សេតព្យនគរំ គន្ត្វា សឹសបាវនំ បាវិសិ ។ ចុល្លកាលស្ស ភរិយាយោ សត្ថា កិរ អនុប្បត្តោតិ សុត្វា ពុទ្ធប្បមុខំ ភិក្ខុសង្ឃំ អាទាយ អាគតោ ។ ភិក្ខុសង្ឃស្ស បន ភត្តកិច្ចាវសានេ មហាកាលស្ស ភរិយាយោ ឥមាហិ អត្តនោ សាមិកោ គហិតោ មយំបិ អម្ហាកំ សាមិកំ គណ្ហិស្សាមាតិ ចិន្តេត្វា បុនទិវសត្ថាយ សត្ថារំ និមន្តយឹសុ ។ តទា បន អាសនបញ្ញាបនត្ថំ អញ្ញោ ភិក្ខុ អគមាសិ ។ តា តស្មឹ ខណេ ឱកាសំ អលភិត្វា ពុទ្ធប្បមុខំ ភិក្ខុសង្ឃំ និសីទាបេត្វា ភិក្ខំ អទំសុ ។ ចុល្លកាលស្ស បន ទេ្វ ភរិយាយោ មជ្ឈិមកាលស្ស ចតស្សោ មហាកាលស្ស អដ្ឋ ។ ភិក្ខូបិ ភត្តកិច្ចំ កាតុកាមា និសីទិត្វា ភត្តកិច្ចមកំសុ ពហិ គន្តុកាមា ឧដ្ឋាយ អគមំសុ ។ សត្ថា បន និសីទិត្វា ភត្តកិច្ចំ ករិ ។ តស្ស ភត្តកិច្ចបរិយោសានេ តា ឥត្ថិយោ ភន្តេ មហាកាលោ អម្ហាកំ អនុមោទនំ កត្វា គមិស្សតិ តុម្ហេ បុរតោ គច្ឆថាតិ វទឹសុ ។ សត្ថា សាធូតិ វត្វា បុរតោ អគមាសិ ។ គាមទ្វារំ បត្វា ភិក្ខុសង្ឃោ ឧជ្ឈាយិ កិន្នាមេតំ សត្ថារា កតំ ញត្វា នុ ខោ កតំ ឧទាហុ អជានិត្វា ហិយ្យោ ចុល្លកាលស្ស បុរតោ គតត្តា បព្វជ្ជន្តរាយោ ជាតោ អជ្ជ អញ្ញស្ស បុរតោ គតត្តា អន្តរាយោ នាហោសិ ឥទានិ សត្ថា មហាកាលំ និវត្តេត្វា អាគតោ សីលវា ខោ បន ភិក្ខុ អាចារសម្បន្នោ ករិស្សន្តិ នុ ខោ តស្ស បព្វជ្ជន្តរាយន្តិ ។ សត្ថា តេសំ វចនំ សុត្វា និវត្តិត្វា ឋិតោ កឹ កថេថ ភិក្ខវេតិ បុច្ឆិ ។ តេ តមត្ថំ អារោចេសុំ ។ កឹ បន តុម្ហេ ភិក្ខវេ ចុល្លកាលំ វិយ មហាកាលំ សល្លក្ខេថាតិ ។ អាម ភន្តេ តស្ស ហិ ទេ្វ បជាបតិយោ ឥមស្ស អដ្ឋ អដ្ឋហិ បរិក្ខិបិត្វា គហិតោ កឹ ករិស្សតិ ភន្តេតិ ។ សត្ថា មា ភិក្ខវេ ឯវំ អវចុត្ថ ចុល្លកាលោ ឧដ្ឋាយ សមុដ្ឋាយ សុភារម្មណពហុលោ វិហរតិ បបាតតដេ ឋិតទុព្វលរុក្ខសទិសោ មយ្ហំ បន បុត្តោ មហាកាលោ អសុភានុបស្សី វិហរតិ ឃនសេលបព្វតោ វិយ អចលោ វាតិ វត្វា ឥមា គាថាយោ អភាសិ
សុភានុបស្សឹ វិហរន្តំ ឥន្ទ្រិយេសុ អសំវុតំ
ភោជនម្ហិ អមត្តញ្ញញ កុសីតំ ហីនវីរិយំ
តំ វេ បសហតី មារោ វាតោ រុក្ខំវ ទុព្វលំ ។
អសុភានុបស្សឹ វិហរន្តំ ឥន្ទ្រិយេសុ សុសំវុតំ
ភោជនម្ហិ ច មត្តញ្ញញ សទ្ធំ អារទ្ធវីរិយំ
តំ វេ នប្បសហតី មារោ វាតោ សេលំវ បព្វតន្តិ ។
តត្ថ សុភានុបស្សិន្តិ សុភំ អនុបស្សន្តំ ។ ឥដ្ឋារម្មណេ មានសំ វិស្សជ្ជេត្វា វិហរន្តន្តិ អត្ថោ ។ យោ ហិ បុគ្គលោ និមិត្តគ្គាហំ អនុព្យញ្ជនគ្គាហំ គណ្ហន្តោ នខា សោភណាតិ គណ្ហាតិ អង្គុលិយោ សោភណាតិ គណ្ហាតិ ហត្ថា បាទា ជង្ឃា ឩរូ កដិ ឧទរំ ថនា គីវា ឱដ្ឋោ ទន្តា មុខំ នាសា អក្ខីនិ កណ្ណា ភមុកា លលាដំ កេសា សោភណាតិ គណ្ហាតិ កេសា លោមា នខា ទន្តា តចោ សោភណោតិ គណ្ហាតិ វណ្ណោ សុភោ សណ្ឋានំ សុភន្តិ គណ្ហាតិ អយំ សុភានុបស្សី នាម តំ ឯវំ សុភានុបស្សឹ វិហរន្តំ ។ ឥន្ទ្រិយេសូតិ ចក្ខាទីសុ ឆសុ ឥន្ទ្រិយេសុ ។ អសំវុតន្តិ ចក្ខុទ្វារាទីនិ អរក្ខន្តំ ។ អមត្តញ្ញុន្តិ បរិយេសនមត្តា បដិគ្គហណមត្តា បរិភោគមត្តាតិ ឥមិស្សា មត្តាយ អជាននតោ ភោជនម្ហិ អមត្តញ្ញញ ។ អបិច បច្ចវេក្ខណមត្តា វិស្សជ្ជនមត្តាតិ ឥមិស្សាបិ មត្តាយ អជាននតោ អមត្តញ្ញញ ។ ឥទំ ភោជនំ ធម្មិកំ ឥទំ អធម្មិកន្តិបិ អជានន្តំ ។ កុសីតន្តិ កាមព្យាបាទវិហឹសាវិតក្កវសិកតាយ កុសីតំ ។ ហីនវីរិយន្តិ និព្វីរិយំ ចតូសុ ឥរិយាបថេសុ វីរិយករណវិរហិតំ ។
បសហតីតិ អភិភវតិ អជ្ឈោត្ថរតិ ។ វាតោ រុក្ខំវ ទុព្វលន្តិ ពលវវាតោ ឆិន្នតដេ ជាតំ ទុព្វលរុក្ខំ វិយ ។ យថា ហិ សោ វាតោ តស្ស រុក្ខស្ស បុប្ផផលបល្លវាទីនិបិ បាតេតិ ខុទ្ទកសាខាបិ ភញ្ជតិ មហាសាខាបិ ភញ្ជតិ សមូលំបិ តំ រុក្ខំ ឧព្វត្តេត្វា ឧទ្ធមូលំ អធោសាខំ កត្វា គច្ឆតិ ឯវមេវ ឯវរូបំ បុគ្គលំ អន្តោ ឧប្បន្នោ កិលេសមារោ បសហតិ ពលវវាតោ ទុព្វលរុក្ខស្ស បុប្ផផលបល្លវាទិបាតនំ វិយ ខុទ្ទានុខុទ្ទកាបត្តិអាបជ្ជនំបិ ករោតិ ខុទ្ទកសាខាភញ្ជនំ វិយ និស្សគ្គិយាទិអាបត្តិអាបជ្ជនំបិ ករោតិ មហាសាខាភញ្ជនំ វិយ តេរសសង្ឃាទិសេសាបជ្ជនំបិ ករោតិ ឧព្វត្តេត្វា ឧទ្ធមូលំ ហេដ្ឋាសាខំ កត្វា បាតនំ វិយ បារាជិកាបត្តិអាបជ្ជនំបិ ករោតិ ស្វាក្ខាតសាសនា នីហរិត្វា កតិបាហេនេវ គិហិភាវំ បាបេតិ ឯវរូបំ បុគ្គលំ កិលេសមារោ អត្តនោ វសេ វត្តេតីតិ អត្ថោ ។ អសុភានុបស្សិន្តិ ទសសុ អសុភេសុ អញ្ញតរំ អសុភំ បស្សន្តំ បដិកូលមនសិការេ យុត្តំ កេសេ អសុភតោ បស្សន្តំ លោមេ នខេ ទន្តេ តចំ វណ្ណំ សណ្ឋានំ អសុភតោ បស្សន្តំ ។ ឥន្ទ្រិយេសូតិ ឆសុ ឥន្ទ្រិយេសុ ។ សុសំវុតន្តិ និមិត្តគ្គាហាទិវិរហិតំ បិហិតទ្វារំ ។ អមត្តញ្ញុតាបដិបក្ខេន ភោជនម្ហិ ច មត្តញ្ញញ ។ សទ្ធន្តិ កម្មស្ស ចេវ ផលស្ស ច សទ្ទហនលក្ខណាយ លោកិយសទ្ធាយ ចេវ តីសុ វត្ថូសុ អវេច្ចប្បសាទសង្ខាតាយ លោកុត្តរសទ្ធាយ ច សមន្នាគតំ ។ អារទ្ធវីរិយន្តិ បគ្គហិតវីរិយំ បរិបុណ្ណវីរិយំ ។ តំ វេតិ តំ ឯវរូបំ បុគ្គលំ ។ យថា ទុព្វលវាតោ សណិកំ បហរន្តោ ឯកឃនំ សេលំ ចាលេតុំ ន សក្កោតិ តថា អព្ភន្តរេ ឧប្បជ្ជមានោបិ ទុព្វលកិលេសមារោ នប្បសហតិ ខោភេតុំ កម្បេតុំ ចាលេតុំ ន សក្កោតីតិ អត្ថោ ។
តាបិ ខោ តស្ស បុរាណទុតិយិកា ថេរំ បរិវារេត្វា ត្វំ កំ អាបុច្ឆិត្វា បព្វជិតោ ឥទានិ គិហី ភវិស្សសិ ន ភវិស្សសីតិអាទីនិ វត្វា កាសាយានិ នីហរិតុកាមា អហេសុំ ។ ថេរោ តាសំ អាការំ សល្លក្ខេត្វា និសិន្នាសនា វុដ្ឋាយ ឥទ្ធិយា ឧប្បតិត្វា កូដាគារកណ្ណិកំ ភិន្ទិត្វា អាកាសេន គន្ត្វា សត្ថរិ គាថា បរិយោសាបេន្តេយេវ សត្ថុ សុវណ្ណវណ្ណំ សរីរំ អភិត្ថវន្តោ ឱតរិត្វា តថាគតស្ស បាទេ វន្ទិ ។
គាថាបរិយោសានេ សម្បត្តភិក្ខូ សោតាបត្តិផលាទីសុ បតិដ្ឋហឹសូតិ ។
No comments:
Post a Comment