៧.ទេវទត្តវត្ថុ
អនិក្កសាវោតិ ឥមំ ធម្មទេសនំ សត្ថា ជេតវនេ វិហរន្តោ រាជគហេ ទេវទត្តស្ស គន្ធារកាសាវលាភំ អារព្ភ កថេសិ ។ឯកស្មឹ ហិ សមយេ ទេ្វ អគ្គសាវកា បញ្ចសតេ បញ្ចសតេ អត្តនោ បរិវារេ អាទាយ សត្ថារំ អាបុច្ឆិត្វា ជេតវនតោ រាជគហំ អគមំសុ ។ រាជគហវាសិនោ ទេ្វបិ តយោបិ ពហូបិ ឯកតោ ហុត្វា អាគន្តុកទានំ អទំសុ ។ អថេកទិវសំ អាយស្មា សារីបុត្តោ អនុមោទនំ ករោន្តោ ឧបាសកា ឯកោ សយំ ទានំ ទេតិ បរំ ន សមាទបេតិ សោ និព្វត្តនិព្វត្តដ្ឋានេ ភោគសម្បទំ លភតិ នោ បរិវារសម្បទំ ឯកោ បរំ សមាទបេតិ សយំ ន ទេតិ និព្វត្តនិព្វត្តដ្ឋានេ បរិវារសម្បទំ លភតិ នោ ភោគសម្បទំ ឯកោ សយំបិ ន ទេតិ បរំបិ ន សមាទបេតិ សោ និព្វត្តនិព្វត្តដ្ឋានេ កញ្ជិកមត្តំបិ កុច្ឆិបូរំ ន លភតិ អនាថោ ហោតិ និប្បច្ចយោ ឯកោ សយំបិ ទេតិ បរំបិ សមាទបេតិ សោ និព្វត្តនិព្វត្តដ្ឋានេ អត្តភាវសតេបិ អត្តភាវសហស្សេបិ អត្តភាវសតសហស្សេបិ ភោគសម្បទញ្ចេវ បរិវារសម្បទញ្ច លភតីតិ ឯវំ ធម្មំ ទេសេសិ ។ តមេកោ បណ្ឌិតបុរិសោ សុត្វា អច្ឆរិយា វត ភោ ធម្មទេសនា សុខការណំ កថិតំ មយា ឥមាសំ ទ្វិន្នំ សម្បត្តីនំ និប្ផាទនកកម្មំ កាតុំ វដ្ដតីតិ ចិន្តេត្វា ភន្តេ សេ្វ មយ្ហំ ភិក្ខំ គណ្ហថាតិ ថេរំ និមន្តេសិ ។ កិត្តកេហិ តេ ភិក្ខូហិ អត្ថោ ឧបាសកាតិ ។ កិត្តកា បន វោ ភន្តេ បរិវារាតិ ។ សហស្សមត្តា ឧបាសកាតិ ។ សព្វេហិ សទ្ធឹយេវ ភិក្ខំ គណ្ហថ ភន្តេតិ ។ ថេរោ អធិវាសេសិ ។ ឧបាសកោ នគរវីថិយំ ចរន្តោ អម្មតាតា មយា ភិក្ខុសហស្សំ និមន្តិតំ តុម្ហេ កិត្តកានំ ភិក្ខូនំ ភិក្ខំ ទាតុំ សក្ខិស្សថ តុម្ហេ កិត្តកានន្តិ សមាទបេតិ ។ មនុស្សា អត្តនោ អត្តនោ បហោនកនិយាមេន មយំ ទសន្នំ ទស្សាម មយំ វីសតិយា មយំ សតស្សាតិ អាហំសុ ។ ឧបាសកោ តេនហិ ឯកស្មឹ ឋានេ សមាគមំ កត្វា ឯកតោវ បចិស្សាម សព្វេ តេលតិលតណ្ឌុលសប្បិផាណិតាទីនិ សមាហរថាតិ ឯកស្មឹ ឋានេ សមាហរាបេសិ ។ អថស្ស ឯកោ កុដុម្ពិកោ សតសហស្សគ្ឃនកំ គន្ធារកាសាវវត្ថំ ទត្វា សចេ តេ ទានវដ្ដំ នប្បហោតិ ឥទំ វិស្សជ្ជេត្វា យទូនំ តំ បូរេយ្យាសិ សចេ បហោតិ យស្ស ឥច្ឆសិ តស្ស ភិក្ខុនោ ទទេយ្យាសីតិ អាហ ។ តទា តស្ស សព្វំ ទានវដ្ដំ បហោសិ កិញ្ចិ ឩនន្នាម នាហោសិ ។ សោ មនុស្សេ បុច្ឆិ ឥទំ អនគ្ឃកាសាវំ ឯកេន កុដុម្ពិកេន ឯវំ នាម វត្វា ទិន្នំ ទានវដ្ដំ អតិរេកំ ជាតំ កស្សិទំ ទេមាតិ ។ ឯកច្ចេ សារីបុត្តត្ថេរស្សាតិ អាហំសុ ។ ឯកច្ចេ ថេរោ សស្សបរិបាកសមយេ អាគន្ត្វា គមនសីលោ ទេវទត្តោ អម្ហាកំ មង្គលាមង្គលេសុ សហាយោ ឧទកមណិកោ វិយ និច្ចំ បតិដ្ឋិតោ តស្ស តំ ទេមាតិ អាហំសុ ។ សម្ពហុលិកាយ កថាយបិ ទេវទត្តស្ស ទាតព្វន្តិ វត្តារោ ពហុតរា អហេសុំ ។ អថ នំ ទេវទត្តស្ស អទំសុ ។ សោ តំ ឆិន្ទិត្វា សិព្វិត្វា រជិត្វា និវាសេត្វា បារុបិត្វា វិចរតិ ។ មនុស្សា តំ ទិស្វា នយិទំ ទេវទត្តស្ស អនុច្ឆវិកំ សារីបុត្តត្ថេរស្ស អនុច្ឆវិកំ ទេវទត្តោ អត្តនោ អននុច្ឆវិកំ និវាសេត្វា បារុបិត្វា វិចរតីតិ វទឹសុ ។
អថេកោ ទិសាវាសិកោ ភិក្ខុ រាជគហា សាវត្ថឹ គន្ត្វា សត្ថារំ វន្ទិត្វា កតបដិសន្ថារោ សត្ថារា ទ្វិន្នំ អគ្គសាវកានំ ផាសុវិហារំ បុច្ឆិតោ អាទិតោ បដ្ឋាយ សព្វំ តំ បវត្តឹ អារោចេសិ ។ សត្ថា ន ខោ ភិក្ខុ ឥទានេវ សោ អត្តនោ អននុច្ឆវិកំ វត្ថំ ធារេតិ បុព្វេបិ ធារេសិយេវាតិ វត្វា អតីតំ អាហរិ
អតីតេ ពារាណសិយំ ព្រហ្មទត្តេ រជ្ជំ ការេន្តេ ពារាណសីវាសី ឯកោ ហត្ថិមារកោ ហត្ថឹ មារេត្វា ទន្តេ ច តចេ ច អន្តានិ ច ឃនមំសញ្ច អាហរិត្វា វិក្កីណន្តោ ជីវិតំ កប្បេសិ ។ អថេកស្មឹ អរញ្ញេ អនេកសហស្សា ហត្ថី គោចរំ គហេត្វា គច្ឆន្តា បច្ចេកពុទ្ធេ ទិស្វា តតោ បដ្ឋាយ គច្ឆមានា គមនាគមនកាលេ ជន្នុកេហិ និបតិត្វា វន្ទិត្វា បក្កមន្តិ ។ ឯកទិវសំ ហត្ថិមារកោ តំ កិរិយំ ទិស្វា អហំ ឥមេ កិច្ឆេន មារេមិ ឥមេ ច គមនាគមនកាលេ បច្ចេកពុទ្ធេ វន្ទន្តិ កិន្នុ ខោ ទិស្វា វន្ទន្តីតិ ចិន្តេន្តោ កាសាវន្តិ សល្លក្ខេត្វា មយាបិ ឥទានិ កាសាវំ លទ្ធុំ វដ្ដតីតិ ចិន្តេត្វា ឯកស្ស បច្ចេកពុទ្ធស្ស ជាតស្សរំ ឱរុយ្ហ នហាយន្តស្ស តីរេ ឋបិតេសុ កាសាវេសុ ចីវរំ ថេនេត្វា តេសំ ហត្ថីនំ គមនាគមនមគ្គេ សត្តឹ គហេត្វា សសីសំ បារុបិត្វា និសីទតិ ។ ហត្ថី តំ ទិស្វា បច្ចេកពុទ្ធោតិ សញ្ញាយ វន្ទិត្វា បក្កមន្តិ ។ សោ តេសំ សព្វបច្ឆតោ គច្ឆន្តំ សត្តិយា បហរិត្វា មារេត្វា ទន្តាទីនិ គហេត្វា សេសំ ភូមិយំ និខនិត្វា គច្ឆតិ ។ អបរភាគេ ពោធិសត្តោ ហត្ថិយោនិយំ បដិសន្ធឹ គហេត្វា ហត្ថិជេដ្ឋកោ យូថបតិ អហោសិ ។ តទាបិ សោ តថេវ ករោតិ ។ មហាបុរិសោ អត្តនោ បរិសាយ បរិហានឹ ញត្វា កុហឹ ឥមេ ហត្ថី គតា មន្ទា ជាតាតិ បុច្ឆិត្វា ន ជានាម សាមីតិ វុត្តេ យត្ថ កត្ថចិ គច្ឆន្តា មំ អនាបុច្ឆា ន គមិស្សន្តិ បរិបន្ថេន ភវិតព្វន្តិ ចិន្តេត្វា ឯកស្មឹ ឋានេ កាសាវំ បារុបិត្វា និសិន្នស្ស សន្តិកា បរិបន្ថេន ភវិតព្វន្តិ បរិសង្កិត្វា តំ បរិគ្គណ្ហិតុំ សព្វេ ហត្ថី បុរតោ បេសេត្វា សយំ បច្ឆតោ វិលម្ពមានោ អាគច្ឆតិ ។ សោ សេសហត្ថីសុ វន្ទិត្វា គតេសុ មហាបុរិសំ អាគច្ឆន្តំ ទិស្វា ចីវរំ សំហរិត្វា សត្តឹ វិស្សជ្ជិ ។ មហាបុរិសោ សតឹ ឧបដ្ឋបេត្វា អាគច្ឆន្តោ បច្ឆតោ បដិក្កមិត្វា សត្តឹ វញ្ចេសិ ។ អថ នំ ឥមិនា មេ ហត្ថី នាសិតាតិ គណ្ហិតុំ បក្ខន្ទិ ។ ឥតរោ ឯកំ រុក្ខំ បុរតោ កត្វា និលីយិ ។ អថ នំ រុក្ខេន សទ្ធឹ សោណ្ឌាយ បរិក្ខិបិត្វា គហេត្វា ភូមិយំ បោថេស្សាមីតិ តេន នីហរិត្វា ទស្សិតំ កាសាវំ ទិស្វា សចាហំ ឥមស្មឹ ទុស្សិស្សាមិ អនេកសហស្សេសុ មេ ពុទ្ធប្បច្ចេកពុទ្ធខីណាសវេសុ លជ្ជា នាម ភិន្នា ភវិស្សតីតិ អធិវាសេត្វា តយា មេ ឯត្តកា ញាតកា នាសិតាតិ បុច្ឆិ ។ អាម សាមីតិ ។ កស្មា ឯវំ ភារិយំ កម្មំ អកាសិ អត្តនោ អននុច្ឆវិកំ វីតរាគានំ អនុច្ឆវិកំ វត្ថំ បរិទហិត្វា ឯវរូបំ បាបកម្មំ ករោន្តេន ភារិយំ តយា កតន្តិ ។ ឯវញ្ច បន វត្វា ឧត្តរឹបិ និគ្គណ្ហន្តោ
អនិក្កសាវោ កាសាវំ យោ វត្ថំ បរិទហេស្សតិ
អបេតោ ទមសច្ចេន ន សោ កាសាវមរហតិ
យោ ច វន្តកសាវស្ស សីលេសុ សុសមាហិតោ
ឧបេតោ ទមសច្ចេន ស វេ កាសាវមរហតីតិ
គាថា វត្វា អយុត្តន្តេ កតន្តិ វត្វា តំ វិស្សជ្ជេសិ ។ សត្ថា ឥមំ ធម្មទេសនំ អាហរិត្វា តទា ហត្ថិមារកោ ទេវទត្តោ អហោសិ តស្ស និគ្គហកោ ហត្ថិនាគោ អហមេវាតិ ជាតកំ សមោធានេត្វា ន ខោ ភិក្ខុ ឥទានេវ បុព្វេបិ ទេវទត្តោ អត្តនោ អននុច្ឆវិកំ វត្ថំ ធារេសិយេវាតិ វត្វា ឥមា គាថា អភាសិ
អនិក្កសាវោ កាសាវំ យោ វត្ថំ បរិទហេស្សតិ
អបេតោ ទមសច្ចេន ន សោ កាសាវមរហតិ
យោ ច វន្តកសាវស្ស សីលេសុ សុសមាហិតោ
ឧបេតោ ទមសច្ចេន ស វេ កាសាវមរហតីតិ ។
ឆទ្ទន្តជាតកេនាបិ អយមត្ថោ ទីបេតព្វោតិ ។
តត្ថ អនិក្កសាវោតិ កាមរាគាទីហិ កសាវេហិ សកសាវោ ។ បរិទហេស្សតីតិ និវាសនបារុបនត្ថរណវសេន បរិភុញ្ជិស្សតិ ។ បរិទហិស្សតីតិបិ បាឋោ ។ អបេតោ ទមសច្ចេនាតិ ឥន្ទ្រិយទមនេន ចេវ បរមត្ថសច្ចបក្ខិកេន ច វចីសច្ចេន អបេតោ ។ វិយុត្តោតិ អត្ថោ ។ ន សោតិ សោ ឯវរូបោ បុគ្គលោ កាសាវំ បរិទហិតុំ នារហតិ ។ វន្តកសាវស្សាតិ ចតូហិ មគ្គេហិ វន្តកសាវោ ឆឌ្ឌិតកសាវោ បហីនកសាវោ អស្ស ។ សីលេសូតិ ចតូសុ បារិសុទ្ធិសីលេសុ ។ សុសមាហិតោតិ សុដ្ឋុ សមាហិតោ សុដ្ឋុ ឋិតោ ។ ឧបេតោតិ ឥន្ទ្រិយទមនេន ចេវ វុត្តប្បការេន ច វចីសច្ចេន ឧបេតោ ។ ស វេតិ សោ ឯវរូបោ បុគ្គលោ តំ កាសាវវត្ថំ អរហតីតិ ។
គាថាបរិយោសានេ សោ ទិសាវាសិកោ ភិក្ខុ សោតាបន្នោ ជាតោ ។ អញ្ញេបិ ពហូ សោតាបត្តិផលាទីនិ បាបុណឹសុ ។ ទេសនា មហាជនស្ស សាត្ថិកា អហោសីតិ ។
ទេវទត្តវត្ថុ ។
No comments:
Post a Comment