២.មដ្ឋកុណ្ឌលិវត្ថុ
មនោបុព្វង្គមាតិ ទុតិយគាថាបិ សាវត្ថិយំយេវ មដ្ឋកុណ្ឌលឹ អារព្ភ ភាសិតា ។សាវត្ថិយំ កិរ អទិន្នបុព្វកោ នាម ព្រាហ្មណោ អហោសិ ។ តេន កស្សចិ កិញ្ចិ ន ទិន្នបុព្វំ តេន តំ អទិន្នបុព្វកោតេ្វវ សញ្ជានឹសុ ។ តស្សេកបុត្តកោ អហោសិ បិយោ មនាបោ ។ អថស្ស បិលន្ធនំ ការេតុកាមោ សចេ សុវណ្ណការស្សាចិក្ខិស្សាមិ វេតនំ ទាតព្វំ ភវិស្សតីតិ សយមេវ សុវណ្ណំ កោដ្ដេត្វា មដ្ឋានិ កុណ្ឌលានិ កត្វា អទាសិ ។ តេនស្ស បុត្តោ មដ្ឋកុណ្ឌលីតេ្វវ បញ្ញាយិត្ថ ។ តស្ស សោឡសវស្សកាលេ បណ្ឌុរោគោ ឧទបាទិ ។ មាតា បុត្តំ ឱលោកេត្វា ព្រាហ្មណ បុត្តស្ស តេ រោគោ ឧប្បន្នោ តិកិច្ឆាបេហិ នន្តិ អាហ ។ ភោតិ សចេ វេជ្ជំ អានេស្សាមិ ភត្តវេតនំ ទាតព្វំ ភវិស្សតិ ត្វំ មម ធនច្ឆេទំ ន ឱលោកេសីតិ ។ អថ កឹ ករិស្សសិ ព្រាហ្មណាតិ ។ យថា មេ ធនច្ឆេទោ ន ហោតិ តថា ករិស្សាមីតិ ។ សោ វេជ្ជានំ សន្តិកំ គន្ត្វា អសុករោគស្ស នាម តុម្ហេ កឹ ភេសជ្ជំ ករោថាតិ បុច្ឆិ ។ អថស្ស តេ យំ វា តំ វា រុក្ខតចាទឹ អាចិក្ខន្តិ ។ សោ តំ អាហរិត្វា បុត្តស្ស ភេសជ្ជំ ករោតិ ។ តំ ករោន្តស្សេវស្ស រោគោ ពលវា អហោសិ អតេកិច្ឆភាវំ ឧបាគមិ ។ ព្រាហ្មណោ តស្ស ទុព្វលភាវំ ញត្វា ឯកំ វេជ្ជំ បក្កោសិ ។ សោ ឱលោកេត្វា អម្ហាកំ ឯកំ កិច្ចំ អត្ថិ អញ្ញំ វេជ្ជំ បក្កោសិត្វា តិកិច្ឆាបេហីតិ តំ បច្ចក្ខាយ និក្ខមិ ។ ព្រាហ្មណោ តស្ស មរណសមយំ ញត្វា ឥមស្ស ទស្សនត្ថាយ អាគតាគតា អន្តោគេហេ សាបតេយ្យំ បស្សិស្សន្តិ ពហិ នំ ករិស្សាមីតិ បុត្តំ នីហរិត្វា ពហិ អាលិន្ទេ និបជ្ជាបេសិ ។
តំ ទិវសំ ភគវា ពលវបច្ចូសសមយេ មហាករុណាសមាបត្តិតោ វុដ្ឋាយ បុព្វពុទ្ធេសុ កតាធិការានំ ឧស្សន្នកុសលមូលានំ វេនេយ្យពន្ធវានំ ទស្សនត្ថំ ពុទ្ធចក្ខុនា លោកំ វោលោកេន្តោ ទសសហស្សចក្កវាឡេ ញាណជាលំ បត្ថរិ ។ មដ្ឋកុណ្ឌលី ពហិអាលិន្ទេ និបន្នាការេនេវ តស្ស អន្តោ បញ្ញាយិ ។ សត្ថា តំ ទិស្វា តស្ស អន្តោគេហា នីហរិត្វា តត្ថ និប្បជ្ជាបិតភាវំ ញត្វា អត្ថិ នុ ខោ មយ្ហំ ឯត្ថ គតប្បច្ចយេន អត្ថោតិ ឧបធារេន្តោ ឥទំ អទ្ទស អយំ មាណវោ មយិ ចិត្តំ បសាទេត្វា កាលំ កត្វា តាវតឹសទេវលោកេ តឹសយោជនិកេ កនកវិមានេ និព្វត្តិស្សតិ អច្ឆរាសហស្សបរិវារោ ភវិស្សតិ ព្រាហ្មណោបិ តំ ឈាបេត្វា រោទន្តោ អាឡាហនេ វិចរិស្សតិ ទេវបុត្តោ តិគាវុតប្បមាណំ សដ្ឋិសកដភារាលង្ការបដិមណ្ឌិតំ អច្ឆរាសហស្សបរិវារំ អត្តភាវំ ឱលោកេត្វា កេន នុ ខោ កម្មេន មយា អយំ សិរិសម្បត្តិ លទ្ធាតិ ឱលោកេន្តោ មយិ ចិត្តប្បសាទេន លទ្ធភាវំ ញត្វា ធនច្ឆេទភយេន មម ភេសជ្ជំ អការេត្វា ឥទានិ អាឡាហនំ គន្ត្វា រោទតិ វិប្បការប្បត្តំ នំ ករិស្សាមីតិ បិតរិ អក្ខន្តិយា មដ្ឋកុណ្ឌលិវណ្ណេនាគន្ត្វា អាឡាហនស្សាវិទូរេ និប្បជ្ជិត្វា រោទិស្សតិ ។ អថ នំ ព្រាហ្មណោ កោសិ ត្វន្តិ បុច្ឆិស្សតិ អហន្តេ បុត្តោ មដ្ឋកុណ្ឌលីតិ កុហឹ និព្វត្តោសីតិ តាវតឹសភវនេតិ កឹ កម្មំ កត្វាតិ វុត្តេ មយិ ចិត្តប្បសាទេន និព្វត្តភាវំ អាចិក្ខិស្សតិ ព្រាហ្មណោ តុម្ហេសុ ចិត្តំ បសាទេត្វា សគ្គេ និព្វត្តា នាម អត្ថីតិ មំ បុច្ឆិស្សតិ អថស្សាហំ ឯត្តកានិ សតានិ វា សហស្សានិ វា សតសហស្សានិ វាតិ ន សក្កា គណនាយ បរិច្ឆិន្ទិតុន្តិ វត្វា ធម្មបទេ គាថំ ភាសិស្សាមិ គាថាបរិយោសានេ ចតុរាសីតិយា បាណសហស្សានំ ធម្មាភិសមយោ ភវិស្សតិ មដ្ឋកុណឌលី សោតាបន្នោ ភវិស្សតិ តថា អទិន្នបុព្វកោ ព្រាហ្មណោ ឥតិ ឥមំ កុលបុត្តំ និស្សាយ ធម្មយាគោ មហា ភវិស្សតីតិ ញត្វា បុនទិវសេ កតសរីរបដិជគ្គនោ មហាភិក្ខុសង្ឃបរិវុតោ សាវត្ថឹ បិណ្ឌាយ បវិសិត្វា អនុបុព្វេន ព្រាហ្មណស្ស គេហទ្វារំ គតោ ។
តស្មឹ ខណេ មដ្ឋកុណ្ឌលី អន្តោគេហាភិមុខោ និបន្នោ ហោតិ ។ សត្ថា អត្តនោ អបស្សនភាវំ ញត្វា ឯកំ រស្មឹ វិស្សជ្ជេសិ ។ មាណវោ កឹ ឱភាសោ នាមេសោតិ បរិវត្តិត្វា និប្បន្នោវ សត្ថារំ ទិស្វា អន្ធពាលបិតរំ និស្សាយ ឯវរូបំ ពុទ្ធំ ឧបសង្កមិត្វា កាយវេយ្យាវដិកំ វា កាតុំ ទានំ វា ទាតុំ ធម្មំ វា សោតុំ នាលត្ថំ ឥទានិ មេ ហត្ថាបិ អវិធេយ្យា អញ្ញំ កត្តព្វំ នត្ថីតិ មនមេវ បសាទេសិ ។ សត្ថា អលំ ឯត្តកេន ឥមស្សាតិ បក្កាមិ ។ សោ តថាគតេ ចក្ខុបថំ វិជហន្តេយេវ បសន្នមនោ កាលំ កត្វា សុត្តប្បពុទ្ធោ វិយ ទេវលោកេ តឹសយោជនិកេ កនកវិមានេ និព្វត្តិ ។ ព្រាហ្មណោបិស្ស សរីរំ ឈាបេត្វា អាឡាហនេ រោទនបរាយនោ អហោសិ ទេវសិកំ អាឡាហនំ គន្ត្វា រោទតិ កហំ ឯកបុត្តក កហំ ឯកបុត្តកាតិ ។
ទេវបុត្តោបិ អត្តនោ សម្បត្តឹ ឱលោកេត្វា កេន កម្មេន លទ្ធាតិ ឧបធារេន្តោ សត្ថរិ មនោបសាទេនាតិ ញត្វា អយំ ព្រាហ្មណោ មម អផាសុកកាលេ ភេសជ្ជំ អការេត្វា ឥទានិ អាឡាហនំ គន្ត្វា រោទតិ វិប្បការប្បត្តមេតំ កាតុំ វដ្ដតីតិ មដ្ឋកុណ្ឌលិវណ្ណេនាគន្ត្វា អាឡាហនស្សាវិទូរេ ពាហា បគ្គយ្ហ រោទន្តោ អដ្ឋាសិ ។ ព្រាហ្មណោ តំ ទិស្វា អហំ តាវ បុត្តសោកេន រោទាមិ ឯស កិមត្ថំ រោទតិ បុច្ឆិស្សាមិ នន្តិ បុច្ឆន្តោ ឥមំ គាថមាហ
អលង្កតោ មដ្ឋកុណ្ឌលី
មាលាភារី ហរិចន្ទនុស្សទោ
ពាហា បគ្គយ្ហ កន្ទសិ
វនមជ្ឈេ កឹ ទុក្ខិតោ តុវន្តិ ។
សោ អាហ
សោវណ្ណមយោ បភស្សរោ
ឧប្បន្នោ រថបញ្ជរោ មម
តស្ស ចក្កយុគំ ន វិន្ទាមិ
តេន ទុក្ខេន ជហិស្សាមិ ជីវិតន្តិ ។
អថ នំ ព្រាហ្មណោ អាហ
សោវណ្ណមយំ មណិមយំ
លោហមយំ អថ រូបិយមយំ
អាចិក្ខ មេ ភទ្ទមាណវ
ចក្កយុគំ បដិលាភយាមិ តេតិ ។
តំ សុត្វា មាណវោ អយំ បុត្តស្ស ភេសជ្ជំ អកត្វា បុត្តបដិរូបកំ មំ ទិស្វា រោទន្តោ សុវណ្ណាទិមយំ រថចក្កំ ករោមីតិ វទតិ ហោតុ និគ្គណ្ហិស្សាមិ នន្តិ ចិន្តេត្វា កីវមហន្តំ មេ ចក្កយុគំ ករិស្សសីតិ វត្វា យាវមហន្តំ អាកង្ខសីតិ វុត្តេ
ចន្ទសុរិយេហិ មេ អត្ថោ តេ មេ ទេហីតិ យាចិតោ
សោ មាណវោ តស្ស បាវទិ
ចន្ទសុរិយា ឧភយត្ថ ភាតរោ
សោវណ្ណមយោ រថោ មម
តេន ចក្កយុគេន សោភតីតិ ។
អថ នំ ព្រាហ្មណោ អាហ
ពាលោ ខោ ត្វមសិ មាណវ
យោ ត្វំ បត្ថយសេ អបត្ថិយំ
មញ្ញាមិ តុវំ មរិស្សសិ
ន ហិ ត្វំ លច្ឆសិ ចន្ទសុរិយេតិ ។
អថ នំ មាណវោ កឹ បន បញ្ញាយមានស្សត្ថាយ រោទន្តោ ពាលោ ហោតិ ឧទាហុ អបញ្ញាយមានស្សាតិ វត្វា
គមនាគមនំបិ ទិស្សតិ
វណ្ណធាតុ ឧភយត្ថ វីថិយា
បេតោ កាលកតោ នត្ថិ
កោ នីធ កន្ទតំ ពាល្យតរោតិ ។
តំ សុត្វា ព្រាហ្មណោ យុត្តំ ឯស វទតីតិ សល្លក្ខេត្វា
សច្ចំ ខោ វទេសិ មាណវ
អហមេវ កន្ទតំ ពាល្យតរោ
ចន្ទំ វិយ ទារកោ រុទំ
បុត្តំ កាលកតាភិបត្ថយន្តិ
វត្វា តស្ស កថាយ និស្សោកោ ហុត្វា មាណវស្ស ថុតឹ ករោន្តោ ឥមា គាថា អភាសិ
អាទិត្តំ វត មំ សន្តំ ឃតសិត្តំវ បាវកំ
វារិនា វិយ ឱសិញ្ចំ សព្វំ និព្វាបយេ ទរំ
អព្វុហិ វត មេ សល្លំ សោកំ ហទយនិស្សិតំ
យោ មេ សោកបរេតស្ស បុត្តសោកំ អបានុទិ
ស្វាហំ អព្វុឡ្ហសល្លោស្មិ សីតិភូតោស្មិ និព្វុតោ
ន សោចាមិ ន រោទាមិ តវ សុត្វាន មាណវាតិ ។
អថ នំ កោ នាម ត្វន្តិ បុច្ឆន្តោ
ទេវតា នុសិ គន្ធព្វោ អាទូ សក្កោ បុរិន្ទទោ
កោ វា ត្វំ កស្ស វា បុត្តោ កថំ ជានេមុ តំ មយន្តិ ។
អថស្ស មាណវោ
យញ្ច កន្ទសិ យញ្ច រោទសិ
បុត្តំ អាឡាហនេ សយំ ឌហិត្វា
ស្វាហំ កុសលំ ករិត្វាន កម្មំ
តិទសានំ សហព្យតំ បត្តោតិ អាចិក្ខិ ។
ព្រាហ្មណោ អាហ
អប្បំ វា ពហុំ វា នាទ្ទសាម
ទានំ ទទន្តស្ស សកេ អគារេ
ឧបោសថកម្មំ វា តាទិសំ កេន កម្មេន គតោសិ ទេវលោកន្តិ ។
មាណវោ អាហ
អាពាធិកោហំ ទុក្ខិតោ គិលានោ
អាតូររូបោម្ហិ សកេ និវេសនេ
ពុទ្ធំ វិគតរជំ វិតិណ្ណកង្ខំ
អទ្ទក្ខឹ សុគតំ អនោមបញ្ញំ
ស្វាហំ មុទិតមនោ បសន្នចិត្តោ
អញ្ជលឹ អករឹ តថាគតស្ស
តាហំ កុសលំ ករិត្វាន កម្មំ
តិទសានំ សហព្យតំ បត្តោតិ ។
តស្មឹ កថេន្តេ កថេន្តេយេវ ព្រាហ្មណស្ស សកលសរីរំ បីតិយា បរិបូរិ ។ សោ តំ បីតឹ បវេទេន្តោ
អច្ឆរិយំ វត អព្ភុតំ
អញ្ជលិកម្មស្ស អយមីទិសោ វិបាកោ ។
អហំបិ មុទិតមនោ បសន្នចិត្តោ អជ្ជេវ ពុទ្ធំ សរណំ វជាមីតិ អាហ ។
អថ នំ មាណវោ
អជ្ជេវ ពុទ្ធំ សរណំ វជាហិ
ធម្មញ្ច សង្ឃញ្ច បសន្នចិត្តោ
តថេវ សិក្ខាបទានិ បញ្ច
អខណ្ឌផុល្លានិ សមាទិយស្សុ ។
បាណាតិបាតា វិរមស្សុ ខិប្បំ
លោកេ អទិន្នំ បរិវជ្ជយស្សុ
អមជ្ជបោ នោ ច មុសា ភណាហិ
សកេន ទារេន ច ហោហិ តុដ្ឋោតិ អាហ ។
សោ សាធូតិ សម្បដិច្ឆិត្វា ឥមា គាថា អភាសិ
អត្ថកាមោសិ មេ យក្ខ ហិតកាមោសិ ទេវតេ
ករោមិ តុយ្ហំ វចនំ ត្វមសិ អាចរិយោ មម
ឧបេមិ សរណំ ពុទ្ធំ ធម្មញ្ចាបិ អនុត្តរំ
សង្ឃញ្ច នរទេវស្ស គច្ឆាមិ សរណំ អហំ ។
បាណាតិបាតា វិរមាមិ ខិប្បំ
លោកេ អទិន្នំ បរិវជ្ជយាមិ
អមជ្ជបោ នោ ច មុសា ភណាមិ
សកេន ទារេន ច ហោមិ តុដ្ឋោតិ ។
អថ នំ ទេវបុត្តោ ព្រាហ្មណ តវ គេហេ ពហុំ ធនំ អត្ថិ សត្ថារំ ឧបសង្កមិត្វា ទានំ ទេហិ ធម្មំ សុណាហិ បញ្ហំ បុច្ឆាហីតិ វត្វា តត្ថេវន្តរធាយិ ។
No comments:
Post a Comment