ឥត្ថីសទ្ទោ វិយ ហិ អញ្ញោ សទ្ទោ បុរិសានំ សកលសរីរំ ផរិត្វា ឋាតុំ សមត្ថោ នាម នត្ថិ ។ តេនាហ ភគវា នាហំ ភិក្ខវេ អញ្ញំ ឯកសទ្ទម្បិ សមនុបស្សាមិ យោ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីសទ្ទោតិ ។
សាមណេរោ តត្ថ និមិត្តំ គហេត្វា យដ្ឋិកោដឹ វិស្សជ្ជេត្វា តិដ្ឋថ តាវ ភន្តេ កិច្ចំ មេ អត្ថីតិ តស្សា សន្តិកំ គតោ ។ សា តំ ទិស្វា តុណ្ហី អហោសិ ។ សោ តាយ សទ្ធឹ សីលវិបត្តឹ បាបុណិ ។ ថេរោ ចិន្តេសិ ឥទានេវេកោ គីតសទ្ទោ សូយិត្ថ សោ ច ខោ ឥត្ថិយា សាមណេរោបិ ចិរាយតិ សោ សីលវិបត្តឹ បត្តោ ភវិស្សតីតិ ។ សោបិ អត្តនោ កិច្ចំ និដ្ឋាបេត្វា អាគន្ត្វា គច្ឆាម ភន្តេតិ អាហ ។ អថ នំ ថេរោ បុច្ឆិ បាបោ ជាតោសិ សាមណេរាតិ ។ សោ តុណ្ហី ហុត្វា បុនប្បុនំ បុដ្ឋោបិ ន កិញ្ចិ កថេសិ ។ អថ នំ ថេរោ អាហ តាទិសេន បាបេន មម យដ្ឋិកោដិគ្គហណកិច្ចំ នត្ថីតិ ។ សោ សំវេគប្បត្តោ កាសាយានិ អបនេត្វា គិហិនិយាមេន បរិទហិត្វា ភន្តេ អហំ បុព្វេ សាមណេរោ ឥទានិ បនម្ហិ គិហី ជាតោ បព្វជន្តោបិចាហំ ន សទ្ធាយ បព្វជិតោ មគ្គបរិបន្ថភយេន បព្វជិតោ ឯថ គច្ឆាមាតិ អាហ ។ អាវុសោ គិហិបាបោបិ សមណបាបោបិ បាបោយេវ ត្វំ សមណភាវេ ឋត្វាបិ សីលមត្តំ បូរេតុំ នាសក្ខិ គិហី ហុត្វា កិន្នាម កល្យាណំ ករិស្សសិ តាទិសេន បាបេន មម យដ្ឋិកោដិគ្គហណកិច្ចំ នត្ថីតិ ។ ភន្តេ អមនុស្សុបទ្ទូតោ មគ្គោ តុម្ហេ ច អន្ធា កថំ ឥធ វសិស្សថាតិ ។ អថ នំ ថេរោ អាវុសោ ត្វំ មា ឯវំ ចិន្តយិ ឥធេវ មេ និបជ្ជិត្វា មរន្តស្សាបិ អបរាបរំ បវដ្ដេន្តស្សាបិ តយា សទ្ធឹ គមនំ នាម នត្ថីតិ វត្វា ឥមា គាថា អភាសិ
ហន្ទាហំ ហតចក្ខុស្មិ កន្តារទ្ធានមាគតោ
សយមានោ ន គច្ឆាមិ នត្ថិ ពាលេ សហាយតា
ហន្ទាហំ ហតចក្ខុស្មិ កន្តារទ្ធានមាគតោ
មរិស្សាមិ នោ គមិស្សាមិ នត្ថិ ពាលេ សហាយតាតិ ។
តំ សុត្វា ឥតរោ សំវេគជាតោ ភារិយំ វត មេ សាហសិកំ អននុច្ឆវិកំ កម្មំ កតន្តិ ពាហា បគ្គយ្ហ កន្ទន្តោ វនសណ្ឌំ បក្ខន្ទិត្វា តថា បក្កន្តោ វ អហោសិ ។ ថេរស្សាបិ សីលតេជេន សដ្ឋិយោជនាយាមំ បណ្ណាសយោជនវិត្ថតំ បណ្ណរសយោជនពហលំ ជយសុមនបុប្ផវណ្ណំ និសីទនុដ្ឋហនកាលេសុ ឱនមនុន្នមនបកតិកំ សក្កស្ស ទេវរាជស្ស បណ្ឌុកម្ពលសិលាសនំ ឧណ្ហាការំ ទស្សេសិ ។ សក្កោ កោ នុ ខោ មំ ឋានា ចាវេតុកាមោតិ ឱលោកេន្តោ ទិព្វេន ចក្ខុនា ថេរំ អទ្ទស ។
តេនាហុ បោរាណា
សហស្សនេត្តោ ទេវិន្ទោ ទិព្វចក្ខុំ វិសោធយិ
បាបគរហី អយំ បាលោ អាជីវំ បរិសោធយិ
សហស្សនេត្តោ ទេវិន្ទោ ទិព្វចក្ខុំ វិសោធយិ
ធម្មគរុកោ អយំ បាលោ និសិន្នោ សាសនេ រតោតិ ។
អថស្ស ឯតទហោសិ សចាហំ ឯវរូបស្ស បាបគរហិនោ ធម្មគរុកស្ស អយ្យស្ស សន្តិកំ ន គមិស្សាមិ មុទ្ធា មេ សត្តធា ផលេយ្យ គមិស្សាមិស្ស សន្តិកន្តិ ។ តតោ
សហស្សនេត្តោ ទេវិន្ទោ ទេវរជ្ជសិរីធរោ
តំខណេន អាគន្ត្វា ចក្ខុបាលំ ឧបាគមិ ។
ឧបគន្ត្វា ច បន ថេរស្សាវិទូរេ បទសទ្ទំ អកាសិ ។ អថ នំ ថេរោ បុច្ឆិ កោ ឯសោតិ ។ អហំ ភន្តេ អទ្ធិកោតិ ។ កុហឹ យាសិ ឧបាសកាតិ ។ សាវត្ថិយំ ភន្តេតិ ។ យាហិ អាវុសោតិ ។ អយ្យោ បន ភន្តេ កុហឹ គមិស្សតីតិ ។ អហំបិ តត្ថេវ គមិស្សាមីតិ ។ តេនហិ ឯកតោវ គច្ឆាម ភន្តេតិ ។ អហំ ទុព្វលោ មយា សទ្ធឹ គច្ឆន្តស្ស តវ បបញ្ចោ ភវិស្សតីតិ ។ មយ្ហំ អច្ចាយិកំ នត្ថិ អហំបិ អយ្យេន សទ្ធឹ គច្ឆន្តោ ទសសុ បុញ្ញកិរិយាវត្ថូសុ ឯកំ លភិស្សាមិ ឯកតោវ គច្ឆាម ភន្តេតិ ។ ថេរោ ឯសោ សប្បុរិសោ ភវិស្សតីតិ ចិន្តេត្វា តេនហិ យដ្ឋិកោដឹ គណ្ហ ឧបាសកាតិ អាហ ។ សក្កោ តថា កត្វា បឋវឹ សង្ខិបន្តោ សាយណ្ហសមយេ ជេតវនំ សម្បាបេសិ ។ ថេរោ សង្ខបណវាទិសទ្ទេ សុត្វា កត្ថេសោ សទ្ទោតិ បុច្ឆិ ។ សាវត្ថិយំ ភន្តេតិ ។ មយំ គមនកាលេ ចិរេន គមិម្ហាតិ ។ អហំ ឧជុកមគ្គំ ជានាមិ ភន្តេតិ ។ តស្មឹ ខណេ ថេរោ នាយំ មនុស្សោ ទេវតា ភវិស្សតីតិ សល្លក្ខេសិ ។
សហស្សនេត្តោ ទេវិន្ទោ ទេវរជ្ជសិរីធរោ
សង្ខិបិត្វាន តំ មគ្គំ ខិប្បំ សាវត្ថិមាគមិ ។
សោ ថេរស្សេវត្ថាយ កនិដ្ឋកុដុម្ពិកេន ការិតំ បណ្ណសាលំ នេត្វា ផលកេ និសីទាបេត្វា បិយសហាយវណ្ណេន តស្ស សន្តិកំ គន្ត្វា សម្ម បាលាតិ បក្កោសិ ។ កឹ សម្មាតិ ។ ថេរស្ស អាគតភាវំ ជានាសីតិ ។ ន ជានាមិ កឹ បន ថេរោ អាគតោតិ ។ អាម សម្ម ឥទានាហំ វិហារំ គន្ត្វា ថេរំ តយា ការិតបណ្ណសាលាយំ និសិន្នកំ ទិស្វា អាគតោម្ហីតិ វត្វា បក្កាមិ ។ កុដុម្ពិកោបិ វិហារំ គន្ត្វា ថេរំ ទិស្វា បាទមូលេ បវដ្ដេន្តោ រោទិត្វា ឥទំ ទិស្វា អហំ ភន្តេ តុម្ហាកំ បព្វជិតុំ នាទាសិន្តិអាទីនិ វត្វា ទេ្វ ទាសទារកេ ភុជិស្សេ កត្វា ថេរស្ស សន្តិកេ បព្វាជេត្វា អន្តោគាមតោ យាគុភត្តាទីនិ អាហរិត្វា ថេរំ ឧបដ្ឋហថាតិ បដិបាទេសិ ។ សាមណេរា វត្តបដិវត្តំ កត្វា ថេរំ ឧបដ្ឋហឹសុ ។
អថេកទិវសំ ទិសាវាសិនោ ភិក្ខូ សត្ថារំ បស្សិស្សាមាតិ ជេតវនំ អាគន្ត្វា សត្ថារំ វន្ទិត្វា អសីតិមហាថេរេ ទិស្វា វិហារចារិកំ ចរន្តា ចក្ខុបាលត្ថេរស្ស វសនដ្ឋានំ បត្វា ឥទំបិ បស្សិស្សាមាតិ សាយំ តទភិមុខា អហេសុំ ។ តស្មឹ ខណេ មហាមេឃោ ឧដ្ឋហិ ។ តេ ឥទានិ សាយញ្ច មេឃោ ច ឧដ្ឋិតោ បាតោវ អាគន្ត្វា បស្សិស្សាមាតិ និវត្តឹសុ ។ ទេវោ បឋមយាមេ វស្សិត្វា មជ្ឈិមយាមេ វិគតោ ។ ថេរោ អារទ្ធវិរិយោ អាចិណ្ណចង្កមនោ តស្មា បច្ឆិមយាមេ ចង្កមនំ ឱតរិ ។ តទា បន នវវុដ្ឋាយ ភូមិយា ពហូ ឥន្ទគោបកា ឧដ្ឋហឹសុ ។ តេ ថេរេ ចង្កមន្តេ យេភុយ្យេន វិបជ្ជឹសុ ។ អន្តេវាសិកា ថេរស្ស ចង្កមនដ្ឋានំ កាលស្សេវ ន សម្មជ្ជឹសុ ។ ឥតរេ ភិក្ខូ ថេរស្ស វសនដ្ឋានំ បស្សិស្សាមាតិ អាគន្ត្វា ចង្កមនេ បាណកេ ទិស្វា កោ ឥមស្មឹ ចង្កមតីតិ បុច្ឆឹសុ ។ អម្ហាកំ ឧបជ្ឈាយោ ភន្តេតិ ។ តេ ឧជ្ឈាយឹសុ បស្សថ សមណស្ស កម្មំ សចក្ខុកាលេ និបជ្ជិត្វា និទ្ទាយន្តោ កិញ្ចិ អកត្វា ឥទានិ ចក្ខុវិកលកាលេ ចង្កមាមីតិ ឯត្តកេ បាណេ មារេសិ អត្ថំ ករិស្សាមីតិ អនត្ថំ អករីតិ ។ អថ តេ គន្ត្វា តថាគតស្ស អារោចេសុំ ភន្តេ ចក្ខុបាលត្ថេរោ ចង្កមាមីតិ ពហូ បាណកេ មារេសីតិ ។ កឹ បន សោ តុម្ហេហិ មារេន្តោ ទិដ្ឋោតិ ។ ន ទិដ្ឋោ ភន្តេតិ ។ យថេវ តុម្ហេ តំ ន បស្សថ តថា សោបិ តេ បាណេ ន បស្សតិ ខីណាសវានំ មរណចេតនា នាម នត្ថិ ភិក្ខវេតិ ។ ភន្តេ អរហត្តស្ស ឧបនិស្សយេ សតិ កស្មា អន្ធោ ជាតោតិ ។ អត្តនា កតកម្មវសេន ភិក្ខវេតិ ។ កឹ បន ភន្តេ តេន កតន្តិ ។ តេនហិ ភិក្ខវេ សុណាថ ។
អតីតេ ពារាណសិយំ ពារាណសីរាជេ រជ្ជំ ការេន្តេ ឯកោ វេជ្ជោ គាមនិគមេ ចរិត្វា វេជ្ជកម្មំ ករោន្តោ ឯកំ ចក្ខុទុព្វលំ ឥត្ថឹ ទិស្វា បុច្ឆិ កិន្តេ អផាសុកន្តិ ។ អក្ខីហិ ន បស្សាមីតិ ។ ភេសជ្ជន្តេ ករិស្សាមីតិ ។ ករោហិ សាមីតិ ។ កឹ មេ ទស្សសីតិ ។ សចេ មេ អក្ខីនិ បាកតិកានិ កាតុំ សក្ខិស្សសិ អហន្តេ សទ្ធឹ បុត្តធីតាហិ ទាសី ភវិស្សាមីតិ ។ សោ សាធូតិ ភេសជ្ជំ សំវិទហិ ។ ឯកភេសជ្ជេនេវ អក្ខីនិ បាកតិកានិ អហេសុំ ។ សា ចិន្តេសិ អហំ ឯតស្ស សបុត្តធីតា ទាសី ភវិស្សាមីតិ បដិជានឹ ន ខោ បន មំ សណ្ហេន សមុទាចរិស្សតិ វញ្ចេស្សាមិ នន្តិ ។ សា វេជ្ជេនាគន្ត្វា កីទិសំ ភទ្ទេតិ បុដ្ឋា បុព្វេ មេ អក្ខីនិ ថោកំ រុជ្ជឹសុ ឥទានិ អតិរេកតរំ រុជ្ជន្តីតិ អាហ ។ វេជ្ជោ អយំ មំ វញ្ចេត្វា កិញ្ចិ អទាតុកាមា ន មេ ឯតាយ ទិន្នភតិយា អត្ថោ ឥទានិ តំ អន្ធំ ករិស្សាមីតិ ចិន្តេត្វា គេហំ គន្ត្វា ភរិយាយ តមត្ថំ អាចិក្ខិ ។ សា តុណ្ហី អហោសិ ។ សោ ឯកំ ភេសជ្ជំ យោជេត្វា តស្សា សន្តិកំ គន្ត្វា ភទ្ទេ ឥមំ ភេសជ្ជំ អញ្ ជាហីតិ អញ្ជាបេសិ ។ ទេ្វ អក្ខីនិ ទីបសិខា វិយ វិជ្ឈាយឹសុ ។ សោ វេជ្ជោ ចក្ខុបាលោ អហោសិ ។ ភិក្ខវេ តទា មម បុត្តេន កតកម្មំ បច្ឆតោ បច្ឆតោ អនុពន្ធិ បាបកម្មំ ហិ នាមេតំ ធុរំ វហតោ ពលិវទ្ទស្ស បទំ ចក្កំ វិយ អនុគច្ឆតីតិ ឥទំ វត្ថុំ កថេត្វា អនុសន្ធឹ ឃដេត្វា បតិដ្ឋាបិតមត្តិកំ សាសនំ រាជមុទ្ទាយ លញ្ឆន្តោ វិយ ធម្មរាជា ឥមំ គាថមាហ
មនោបុព្វង្គមា ធម្មា មនោសេដ្ឋា មនោមយា
មនសា ចេ បទុដ្ឋេន ភាសតិ វា ករោតិ វា
តតោ នំ ទុក្ខមនេ្វតិ ចក្កំវ វហតោ បទន្តិ ។
តត្ថ មនោតិ កាមាវចរកុសលាទិភេទំ សព្វម្បិ ចតុភូមិកចិត្តំ ។ ឥមស្មឹ បន បទេ តទា តស្ស វេជ្ជស្ស ឧប្បន្នចិត្តវសេន និយមិយមានំ វវត្ថាបិយមានំ បរិច្ឆិជ្ជមានំ ទោមនស្សសហគតំ បដិឃសម្បយុត្តំ ចិត្តមេវ លព្ភតិ ។ បុព្វង្គមាតិ តេន បឋមគាមិនា ហុត្វា សមន្នាគតា ។ ធម្មាតិ គុណទេសនា- បរិយត្តិនិស្សត្តនិជ្ជីវវសេន ចត្តារោ ធម្មា នាម ។ តេសុ
ន ហិ ធម្មោ អធម្មោ ច ឧភោ សមវិបាកិនោ
អធម្មោ និរយំ នេតិ ធម្មោ បាបេតិ សុគ្គតិន្តិ
អយំ គុណធម្មោ នាម ។ ធម្មំ វោ ភិក្ខវេ ទេសេស្សាមិ អាទិកល្យាណន្តិ អយំ ទេសនាធម្មោ នាម ។ ឥធ បន ភិក្ខវេ ឯកច្ចេ កុលបុត្តា ធម្មំ បរិយាបុណន្តិ សុត្តំ គេយ្យន្តិ អយំ បរិយត្តិធម្មោ នាម ។ តស្មឹ ខោ បន សមយេ ធម្មា ហោន្តិ ខន្ធា ហោន្តីតិ អយំ និស្សត្តធម្មោ នាម ។ និជ្ជីវធម្មោតិបិ ឯសេវ នយោ ។ តេសុ ឥមស្មឹ ឋានេ និស្សត្តនិជ្ជីវធម្មោ អធិប្បេតោ ។ សោ អត្ថតោ តយោ អរូបិនោ ខន្ធា វេទនាក្ខន្ធោ សញ្ញាក្ខន្ធោ សង្ខារក្ខន្ធោតិ ។ ឯតេ ហិ មនោ បុព្វង្គមោ ឯតេសន្តិ មនោបុព្វង្គមា នាម ។ កថំ បនេតេហិ សទ្ធឹ ឯកវត្ថុកោ ឯការម្មណោ អបុព្វំ អចរិមំ ឯកក្ខណេ ឧប្បជ្ជមានោ មនោ បុព្វង្គមោ នាម ហោតីតិ ។ ឧប្បាទប្បច្ចយត្ថេន ។ យថា ហិ ពហូសុ ឯកតោ គាមឃាតាទិកម្មានិ ករោន្តេសុ កោ តេសំ បុព្វង្គមោតិ វុត្តេ យោ តេសំ បច្ចយោ ហោតិ យំ និស្សាយ តេ តំ កម្មំ ករោន្តិ សោ ទត្តោ វា មត្តោ វា តេសំ បុព្វង្គមោតិ វុច្ចតិ ឯវំ សម្បទមិទំ វេទិតព្វំ ។ ឥតិ ឧប្បាទប្បច្ចយត្ថេន មនោ បុព្វង្គមោ ឯតេសន្តិ មនោបុព្វង្គមា ។ ន ហិ តេ មនេ អនុប្បជ្ជន្តេ ឧប្បជ្ជិតុំ សក្កោន្តិ ។ មនោ បន ឯកច្ចេសុ ចេតសិកេសុ អនុប្បជ្ជន្តេសុបិ ឧប្បជ្ជតិយេវ ។ អធិបតិវសេន បន មនោ សេដ្ឋោ ឯតេសន្តិ មនោសេដ្ឋា ។ យថា ហិ ចោរាទីនំ ចោរជេដ្ឋកាទយោ អធិបតិនោ សេដ្ឋា តថា តេសម្បិ មនោតិ មនោសេដ្ឋា ។ យថា បន ទារុអាទីហិ និប្ផន្នានិ តានិ តានិ ភណ្ឌានិ ទារុមយាទីនិ នាម ហោន្តិ តថា ឯតេបិ មនតោ និប្ផន្នត្តា មនោមយា នាម ។ បទុដ្ឋេនាតិ អាគន្តុកេហិ អភិជ្ឈាទីហិ ទោសេហិ បទុដ្ឋេន ។ បកតិមនោ ហិ ភវង្គចិត្តំ ។ តំ អប្បទុដ្ឋំ យថា ហិ បសន្នំ ឧទកំ អាគន្តុកេហិ នីលាទីហិ ឧបក្កិលិដ្ឋំ នីលោទកាទិភេទំ ហោតិ ន ច នវំ ឧទកំ នាបិ បុរិមំ បសន្នឧទកមេវ តថា តម្បិ អាគន្តុកេហិ អភិជ្ឈាទីហិ ទោសេហិ បទុដ្ឋំ ហោតិ ន ច នវំ ចិត្តំ នាបិ បុរិមំ ភវង្គចិត្តមេវ ។ តេនាហ ភគវា បភស្សរមិទំ ភិក្ខវេ ចិត្តំ ។ តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋន្តិ ។ ឯវំ មនសា ចេ បទុដ្ឋេន ។ ភាសតិ វា ករោតិ វាតិ សោ ភាសមានោ ចតុព្វិធំ វចីទុច្ចរិតមេវ ភាសតិ ករោន្តោ តិវិធំ កាយទុច្ចរិតមេវ ករោតិ អភាសន្តោ អករោន្តោ តាយ អភិជ្ឈាទីហិ បទុដ្ឋមានសតាយ តិវិធំ មនោទុច្ចរិតំ បូរេតិ ។ ឯវមស្ស ទស អកុសលកម្មបថា បារិបូរឹ គច្ឆន្តិ ។ តតោ នំ ទុក្ខមនេ្វតីតិ តតោ តិវិធទុច្ចរិតតោ តំ បុគ្គលំ ទុក្ខមនេ្វតិ ទុច្ចរិតានុភាវេន ចតូសុ អបាយេសុ វា មនុស្សេសុ វា តមត្តភាវំ គច្ឆន្តំ កាយវត្ថុកម្បិ ឥតរវត្ថុកម្បីតិ ឥមិនា បរិយាយេន កាយិកចេតសិកំ វិបាកទុក្ខំ អនុគច្ឆតិ ។ យថាកឹ ។ ចក្កំវ វហតោ បទន្តិ ធុរេ យុត្តស្ស ធុរំ វហតោ ពលិវទ្ទស្ស បទំ ចក្កំ វិយ ។ យថា ហិ សោ ឯកំបិ ទិវសំ ទេ្វបិ បញ្ចបិ ទសបិ អឌ្ឍមាសំបិ វហន្តោ ចក្កំ និវត្តេតុំ ជហិតុំ ន សក្កោតិ អថខ្វស្ស បុរតោ អតិក្កមន្តស្ស យុគំ គីវំ ពាធតិ បច្ឆតោ បដិក្កមន្តស្ស ចក្កំ ឩរុមំសំ បដិហន្តិ ឥមេហិ ទ្វីហិ ការណេហិ ពាធន្តំ ចក្កំ តស្ស បទានុបទិកំ ហោន្តិ តថេវ មនសា បទុដ្ឋេន តីណិ ទុច្ចរិតានិ បូរេត្វា ឋិតំ បុគ្គលំ និរយាទីសុ តត្ថ តត្ថ គតដ្ឋានេសុ ទុច្ចរិតមូលកំ កាយិកម្បិ ចេតសិកម្បិ ទុក្ខំ អនុពន្ធតីតិ ។ គាថាបរិយោសានេ តឹសសហស្សា ភិក្ខូ សហ បដិសម្ភិទាហិ អរហត្តំ បាបុណឹសុ ។ សម្បត្តបរិសាយបិ ទេសនា សាត្ថិកា សផលា អហោសីតិ ។
ចក្ខុបាលត្ថេរវត្ថុ ។
No comments:
Post a Comment