ព្រាហ្មណោបិ គេហំ គន្ត្វា ព្រាហ្មណឹ អាមន្តេត្វា ភទ្ទេ អហំ សមណំ គោតមំ និមន្តេត្វា បញ្ហំ បុច្ឆិស្សាមិ សក្ការំ ករោហីតិ វត្វា វិហារំ គន្ត្វា សត្ថារំ នេវ អភិវាទេត្វា ន បដិសន្ថារំ កត្វា ឯកមន្តំ ឋិតោ ភោ គោតម អធិវាសេហិ មេ អជ្ជតនាយ ភត្តំ សទ្ធឹ ភិក្ខុសង្ឃេនាតិ អាហ ។ សត្ថា អធិវាសេសិ ។ សោ សត្ថុ អធិវាសនំ វិទិត្វា វេគេនាគន្ត្វា សកនិវេសនេ ខាទនីយំ ភោជនីយំ បដិយាទាបេសិ ។ សត្ថា ភិក្ខុសង្ឃបរិវុតោ តស្ស គេហំ គន្ត្វា បញ្ញត្តាសនេ និសីទិ ។ ព្រាហ្មណោ សក្កច្ចំ បរិវិសិ ។ មហាជនោ សន្និបតិ ។ មិច្ឆាទិដ្ឋិកេន កិរ តថាគតេ និមន្តិតេ ទេ្វ ជនកាយា សន្និបតន្តិ មិច្ឆាទិដ្ឋិកា អជ្ជ សមណំ គោតមំ បញ្ហំ បុច្ឆាយ វិហេឋិយមានំ បស្សិស្សាមាតិ សន្និបតន្តិ សម្មាទិដ្ឋិកា អជ្ជ ពុទ្ធវិសយំ ពុទ្ធលីឡ្ហំ បស្សិស្សាមាតិ សន្និបតន្តិ ។ អថ ព្រាហ្មណោ កតភត្តកិច្ចំ តថាគតំ ឧបសង្កមិត្វា នីចាសនេ និសិន្នោ បញ្ហំ បុច្ឆិ ភោ គោតម តុម្ហាកំ ទានំ អទត្វា បូជំ អកត្វា ធម្មំ អស្សុត្វា ឧបោសថវាសំ អវសិត្វា កេវលំ មនោបសាទមត្តេនេវ សគ្គេ និព្វត្តា នាម ហោន្តីតិ ។ ព្រាហ្មណ កស្មា មំ បុច្ឆសិ ននុ តេ បុត្តេន មដ្ឋកុណ្ឌលិនា មយិ មនំ បសាទេត្វា អត្តនោ សគ្គេ និព្វត្តភាវោ កថិតោតិ ។ កទា ភោ គោតមាតិ ។ ននុ ត្វំ អជ្ជ សុសានំ គន្ត្វា កន្ទន្តោ អវិទូរេ ពាហា បគ្គយ្ហ កន្ទន្តំ ឯកំ មាណវំ ទិស្វា
អលង្កតោ មដ្ឋកុណ្ឌលី
មាលាភារី ហរិចន្ទនុស្សទោតិ
ទ្វីហិ ជនេហិ កថិតំ កថំ បកាសេន្តោ សព្វំ មដ្ឋកុណ្ឌលិវត្ថុំ កថេសិ ។ តេនេវេតំ ពុទ្ធភាសិតំ នាម ជាតំ ។ តំ កថេត្វា ច បន ន ខោ ព្រាហ្មណ ឯកសតំ ន ទេ្វ អថខោ មយិ មនំ បសាទេត្វា សគ្គេ និព្វត្តានំ គណនា នត្ថីតិ អាហ ។ មហាជនោ វេមតិកោ អហោសិ ។ អថស្ស អនិព្វេមតិកភាវំ វិទិត្វា សត្ថា មដ្ឋកុណ្ឌលិទេវបុត្តោ វិមានេនេវ សទ្ធឹ អាគច្ឆតូតិ អធិដ្ឋាសិ ។ សោ តិគាវុតប្បមាណេន ទិព្វាភរណបដិមណ្ឌិតេន អត្តភាវេនាគន្ត្វា វិមានា ឱរុយ្ហ សត្ថារំ វន្ទិត្វា ឯកមន្តំ អដ្ឋាសិ ។ អថ នំ សត្ថា ត្វំ ឥមំ សម្បត្តឹ កឹ កម្មំ កត្វា បដិលភីតិ បុច្ឆន្តោ
អភិក្កន្តេន វណ្ណេន យា ត្វំ តិដ្ឋសិ ទេវតេ
ឱភាសេន្តី ទិសា សព្វា ឱសធី វិយ តារកា
បុច្ឆាមិ តំ ទេវ មហានុភាវំ
មនុស្សភូតោ កិមកាសិ បុញ្ញន្តិ
គាថមាហ ។
ទេវបុត្តោ អយំ ភន្តេ សម្បត្តិ តុម្ហេសុ មនំ បសាទេត្វា លទ្ធាតិ ។ មយិ មនំ បសាទេត្វា លទ្ធា តេតិ ។ អាម ភន្តេតិ ។ មហាជនោ ទេវបុត្តំ ឱលោកេត្វា អច្ឆរិយា វត ភោ ពុទ្ធគុណា អទិន្នបុព្វកព្រាហ្មណស្ស នាម បុត្តោ អញ្ញំ កិញ្ចិ បុញ្ញំ អកត្វា សត្ថរិ មនំ បសាទេត្វា ឯវរូបំ សម្បត្តឹ បដិលភីតិ តុដ្ឋឹ បវេទេសិ ។ អថ នេសំ កុសលាកុសលកម្មករណេ មនោ បុព្វង្គមោ មនោ សេដ្ឋោ បសន្នេន ហិ មនេន កតកម្មំ ទេវលោកំ មនុស្សលោកំ គច្ឆន្តំ បុគ្គលំ ឆាយាវ ន វិជហតីតិ ឥទំ វត្ថុំ កថេត្វា អនុសន្ធឹ ឃដេត្វា បតិដ្ឋាបិតមត្តិកំ សាសនំ រាជមុទ្ទាយ លញ្ឆន្តោ វិយ ធម្មរាជា ឥមំ គាថមាហ
មនោបុព្វង្គមា ធម្មា មនោសេដ្ឋា មនោមយា
មនសា ចេ បសន្នេន ភាសតិ វា ករោតិ វា
តតោ នំ សុខមនេ្វតិ ឆាយាវ អនុបាយិនីតិ ។
តត្ថ កិញ្ចាបិ មនោតិ អវិសេសេន សព្វម្បិ ចតុភូមិកចិត្តំ វុច្ចតិ ឥមស្មឹ បន បទេ និយមិយមានំ វវត្ថាបិយមានំ បរិច្ឆិជ្ជមានំ អដ្ឋវិធំ កាមាវចរកុសលចិត្តំ លព្ភតិ វត្ថុវសេន បនាហរិយមានំ តតោបិ សោមនស្សសហគតំ ញាណសម្បយុត្តំ ចិត្តមេវ លព្ភតិ ។ បុព្វង្គមាតិ តេន បឋមគាមិនា ហុត្វា សមន្នាគតា ។ ធម្មាតិ វេទនាទយោ តយោ ខន្ធា ។ ឯតេសំ ហិ ឧប្បាទប្បច្ចយត្ថេន មនោ បុព្វង្គមោ តេន មនោបុព្វង្គមា នាម ។ យថា ហិ ពហូសុ ឯកតោ មហាភិក្ខុសង្ឃស្ស បត្តចីវរទានាទីនិ វា ឧឡារបូជាធម្មស្សវនទីបមាលាករណាទីនិ វា បុញ្ញានិ ករោន្តេសុ កោ តេសំ បុព្វង្គមោតិ វុត្តេ យោ តេសំ បច្ចយោ ហោតិ យំ និស្សាយ តេ តានិ បុញ្ញានិ ករោន្តិ សោ តិស្សោ វា បុស្សោ វា តេសំ បុព្វង្គមោតិ វុច្ចតិ ឯវំ សម្បទមិទំ វេទិតព្វំ ។ ឥតិ ឧប្បាទប្បច្ចយត្ថេន មនោ បុព្វង្គមោ ឯតេសន្តិ មនោបុព្វង្គមា ។ ន ហិ តេ មនេ អនុប្បជ្ជន្តេ ឧប្បជ្ជិតុំ សក្កោន្តិ មនោ បន ឯកច្ចេសុ ចេតសិកេសុ អនុប្បជ្ជន្តេសុបិ ឧប្បជ្ជតិយេវ ។ ឯវំ អធិបតិវសេន បន មនោ សេដ្ឋោ ឯតេសន្តិ មនោសេដ្ឋា ។ យថា ហិ គណាទីនំ អធិបតិ បុរិសោ គណសេដ្ឋោ សេនីសេដ្ឋោតិ វុច្ចតិ តថា តេសំបិ មនោតិ មនោសេដ្ឋា ។ យថា បន សុវណ្ណាទីហិ និប្ផន្នានិ តានិ តានិ ភណ្ឌានិ សុវណ្ណមយាទីនិ នាម ហោន្តិ តថា ឯតេបិ មនតោ និប្ផន្នត្តា មនោមយា នាម ។ បសន្នេនាតិ អនភិជ្ឈាទីហិ គុណេហិ បសន្នេន ។ ភាសតិ វា ករោតិ វាតិ ឯវរូបេន មនេន ភាសន្តោ ចតុព្វិធំ វចីសុចរិតមេវ ភាសតិ ។ ករោន្តោ តិវិធំ កាយសុចរិតមេវ ករោតិ អភាសន្តោ អករោន្តោ តាយ អនភិជ្ឈាទីហិ បស្ន្នមានសតាយ តិវិធំ មនោសុចរិតំ បូរេតិ ។ ឯវមស្ស ទស កុសលកម្មបថា បារិបូរឹ គច្ឆន្តិ ។ តតោ នំ សុខមនេ្វតីតិ តតោ តិវិធសុចរិតតោ តំ បុគ្គលំ សុខមនេ្វតិ ។ ឥធ តេភូមិកំបិ កុសលំ អធិប្បេតំ តស្មា តេភូមិកសុចរិតានុភាវេន សុគតិភវេ និព្វត្តំ សុគតិយំ វា សុខានុភវនដ្ឋានេ ឋិតំ កាយវត្ថុកម្បិ ឥតរវត្ថុកម្បីតិ កាយិកចេតសិកំ វិបាកសុខំ អនុគច្ឆតិ ន វិជហតីតិ អត្ថោ វេទិតព្វោ ។ យថាកឹ ឆាយាវ អនុបាយិនីតិ យថា ហិ ឆាយា នាម សរីរប្បដិពទ្ធា សរីរេ គច្ឆន្តេ គច្ឆតិ តិដ្ឋន្តេ តិដ្ឋតិ និសីទន្តេ និសីទតិ ន សក្កា សណ្ហេន វា ផរុសេន វា និវត្តាហីតិ វត្វា វា បោថេត្វា វា និវត្តាបេតុំ ។ កស្មា សរីរប្បដិពទ្ធត្តា ។ ឯវមេវ ឥមេសំ ទសន្នំ កុសលកម្មបថានំ អាចិណ្ណសមាចិណ្ណកុសលមូលកំ កាមាវចរាទិភេទំ កាយិកចេតសិកំ សុខំ គតគតដ្ឋានេ អនុបាយិនី ឆាយា វិយ ហុត្វា ន វិជហតីតិ ។
គាថាបរិយោសានេ ចតុរាសីតិយា បាណសហស្សានំ ធម្មាភិសមយោ អហោសិ ។ មដ្ឋកុណ្ឌលិទេវបុត្តោ សោតាបត្តិផលេ បតិដ្ឋហិ ។ តថា អទិន្នបុព្វកោ ព្រាហ្មណោ ។ សោ តាវមហន្តំ វិភវំ ពុទ្ធសាសនេ វិប្បកិរីតិ ។
មដ្ឋកុណ្ឌលិវត្ថុ ។
No comments:
Post a Comment