៤.កាលីយក្ខិនិយា ឧប្បត្តិវត្ថុ
ន ហិ វេរេន វេរានីតិ ឥមំ ធម្មទេសនំ សត្ថា ជេតវនេ វិហរន្តោ អញ្ញតរំ វញ្ឈិត្ថឹ អារព្ភ កថេសិ ។ឯកោ កិរ កុដុម្ពិកបុត្តោ បិតរិ កាលកតេ ខេត្តេ ច ឃរេ ច សព្វកម្មានិ អត្តនាវ ករោន្តោ មាតរំ បដិជគ្គិ ។ អថស្ស មាតា កុមារិកំ តេ តាត អានេស្សាមីតិ អាហ ។ អម្ម មា ឯវំ វទេថ អហំ យាវជីវំ តុម្ហេ បដិជគ្គិស្សាមីតិ ។ តាត ខេត្តេ ច ឃរេ ច កិច្ចំ ត្វមេវ ករោសិ តេន មយ្ហំ ចិត្តសុខំ នាម ន ហោតិ អានេស្សាមិ តេតិ ។ សោ បុនប្បុនំ បដិក្ខិបិត្វាបិ តុណ្ហី អហោសិ ។ សា ឯកំ កុលំ គន្តុំ គេហា និក្ខមិ ។ អថ នំ បុត្តោ កតរកុលំ គច្ឆថាតិ បុច្ឆិត្វា អសុកន្នាមាតិ វុត្តេ តត្ថ គមនំ បដិសេធេត្វា អត្តនោ អភិរុចិតំ កុលំ អាចិក្ខិ ។ សា តត្ថ គន្ត្វា កុមារិកំ វារេត្វា ទិវសំ វវដ្ឋបេត្វា តំ អានេត្វា តស្ស ឃរេ អកាសិ ។ សា វញ្ឈា អហោសិ ។ អថ នំ មាតា បុត្ត ត្វំ អត្តនោ រុចិយា កុមារិកំ អានាបេសិ សា ឥទានិ វញ្ឈា ជាតា អបុត្តកញ្ច នាម កុលំ វិនស្សតិ បវេណិ ន ឃដិយតិ តេន អញ្ញំ តេ កុមារិកំ អានេស្សាមីតិ តេន អលំ អម្មាតិ វុច្ចមានាបិ បុនប្បុនំ កថេសិ ។ វញ្ឈិត្ថី តំ កថំ សុត្វា បុត្តា នាម មាតាបិតូនំ វចនំ អតិក្កមិតុំ ន សក្កោន្តិ ឥទានិ អញ្ញំ វិជាយិនឹ ឥត្ថឹ អានេត្វា មំ ទាសីភោគេន ភុញ្ជិស្សតិ យន្នូនាហំ សយមេវេកំ កុមារិកំ អានេយ្យន្តិ ចិន្តេត្វា ឯកំ កុលំ គន្ត្វា តស្សត្ថាយ កុមារិកំ វារេត្វា កិន្នាមេតំ អម្ម វទេសីតិ តេហិ បដិក្ខិត្តា អហំ វញ្ឈា អបុត្តកំ កុលំ វិនស្សតិ តុម្ហាកំ ធីតា បុត្តំ បដិលភិត្វា កុដុម្ពស្ស សាមិនី ភវិស្សតិ ទេថ តំ មយ្ហំ សាមិកស្សាតិ យាចិត្វា សម្បដិច្ឆាបេត្វា អានេត្វា សាមិកស្ស ឃរេ អកាសិ ។ អថស្សា ឯតទហោសិ សចាយំ បុត្តំ វា ធីតរំ វា លភិស្សតិ អយមេវ កុដុម្ពស្ស សាមិនី ភវិស្សតិ យថា ទារកំ ន លភតិ តថេវ នំ កាតុំ វដ្ដតីតិ ។ អថ នំ អាហ យទា តេ កុច្ឆិយំ គព្ភោ បតិដ្ឋាតិ តទា មេ អារោចេយ្យាសីតិ ។ សា សាធូតិ បដិសុត្វា គព្ភេ បតិដ្ឋិតេ តស្សា អារោចេសិ ។ តស្សា បន សាយេវ និច្ចំ យាគុភត្តំ ទេតិ ។ អថស្សា អាហារេនេវ សទ្ធឹ គព្ភបាតនភេសជ្ជំ អទាសិ ។ គព្ភោ បតិ ។ ទុតិយម្បិ គព្ភេ បតិដ្ឋិតេ តស្សា អារោចេសិ ។ ឥតរាបិ ទុតិយម្បិ តថេវ បាតេសិ ។ អថ នំ បដិវិស្សកិត្ថិយោ បុច្ឆឹសុ កច្ចិ តេ សបត្តី អន្តរាយំ ករោតីតិ ។ សា តមត្ថំ អារោចេត្វា អន្ធពាលេ កស្មា ឯវមកាសិ អយំ តវ ឥស្សរិយភយេន គព្ភបាតនភេសជ្ជំ យោជេត្វា ទេតិ តេន តេ គព្ភោ បតតិ មា បុន ឯវមកាសីតិ វុត្តា តតិយវារេ ន កថេសិ ។ អថស្សា ឥតរា ឧទរំ ទិស្វា កស្មា មយ្ហំ គព្ភស្ស បតិដ្ឋិតភាវំ ន កថេសីតិ វត្វា ត្វំ មំ អានេត្វា ទេ្វ វារេ គព្ភំ បាតេសិ កិមត្ថំ តុយ្ហំ កថេមីតិ វុត្តេ នដ្ឋាទានិម្ហីតិ ចិន្តេត្វា តស្សា បមាទំ ឱលោកេន្តី បរិណតេ គព្ភេ ឱកាសំ លភិត្វា ភេសជ្ជំ យោជេត្វា អទាសិ ។ គព្ភោ បរិណតត្តា បតិតុំ អសក្កោន្តោ តិរិយំ និបជ្ជិ ។ តិព្វា ខរា វេទនា ឧប្បជ្ជិ ។ ជីវិតសំសយំ បាបុណិ ។ សា នាសិតម្ហិ តយា ត្វមេវ មំ អានេត្វា តយោ ទារកេ នាសេសិ ឥទានិ សយំបិ នស្សាមិ ឥតោទានិ ចុតា យក្ខិនី ហុត្វា តវ ទារកេ ខាទិតុំ សមត្ថា ហុត្វា និព្វត្តេយ្យន្តិ បត្ថនំ ឋបេត្វា កាលំ កត្វា តស្មឹយេវ គេហេ មជ្ជារី ហុត្វា និព្វត្តិ ។ ឥតរំបិ សាមិកោ គហេត្វា តយា មេ កុលុបច្ឆេទោ កតោតិ កប្បរជន្នុកាទីហិ សុបោថិតំ បោថេសិ ។ សា តេនេវាពាធេន កាលំ កត្វា តត្ថេវ កុក្កុដី ហុត្វា និព្វត្តិ ។
ន ចិរស្សេវ កុក្កុដី អណ្ឌានិ វិជាយិ ។ មជ្ជារី អាគន្ត្វា តានិ ខាទិ ។ ទុតិយម្បិ តតិយម្បិ ខាទិយេវ ។ កុក្កុដី តយោ វារេ មម អណ្ឌានិ ខាទិត្វា ឥទានិ មំបិ ខាទិតុកាមាសិ ឥតោទានិ ចុតា តំ សបុត្តកំ ខាទិតុំ លភេយ្យន្តិ បត្ថនំ កត្វា តតោ ចុតា ទីបិនី ហុត្វា និព្វត្តិ ។ ឥតរាបិ មិគី ហុត្វា និព្វត្តិ ។ តស្សា វិជាតវិជាតកាលេ ទីបិនី អាគន្ត្វា តយោ វារេ បុត្តកេ ខាទិ ។ មិគី មរណកាលេ ឥមាយ មេ តិក្ខត្តុំ បុត្តា ខាទិតា ឥទានិ មំបិ ខាទិស្សតិ ឥតោទានិ ចុតា ឯតំ សបុត្តកំ ខាទិតុំ លភេយ្យន្តិ បត្ថនំ កត្វា កាលំ កត្វា យក្ខិនី ហុត្វា និព្វត្តិ ។ ទីបិនីបិ តតោ ចុតា សាវត្ថិយំ កុលធីតា ហុត្វា និព្វត្តិ ។ សា វុឌ្ឍិប្បត្តា ទ្វារគាមេ បតិកុលំ អគមាសិ ។ អបរភាគេ បុត្តំ វិជាយិ ។ យក្ខិនី តស្សា បិយសហាយិកាវណ្ណេន អាគន្ត្វា កុហឹ មេ សហាយិកាតិ បុច្ឆិ ។ អន្តោគព្ភេ វិជាតាតិ អាហំសុ ។ សា តំ សុត្វា បុត្តំ នុ ខោ វិជាតា ឧទាហុ ធីតរំ បស្សិស្សាមិ នន្តិ បវិសិត្វា បស្សន្តី វិយ ទារកំ គហេត្វា ខាទិត្វា គតា ។ ទុតិយវារេបិ តថេវ ខាទិ ។ តតិយវារេ ឥតរា គរុគព្ភា ហុត្វា សាមិកំ អាមន្តេត្វា សាមិ ឥមស្មឹ ឋានេ ឯកា យក្ខិនី មម ទេ្វ បុត្តេ ខាទិត្វា គតា ឥទានិ មម កុលគេហំ គន្ត្វា វិជាយិស្សាមីតិ កុលគេហំ គន្ត្វា វិជាយិ ។ តទា សា យក្ខិនី ឧទកវារំ គតា ហោតិ ។ វេស្សវណស្ស ហិ យក្ខិនិយោ វារេន អនោតត្តតោ សីសបរម្បរាយ ឧទកំ អាហរន្តិយោ ចាតុម្មាសច្ចយេនបិ បញ្ចមាសច្ចយេនបិ មុច្ចន្តិ ។ អបរា កិលន្តកាយា ជីវិតក្ខយំបិ បាបុណន្តិ ។ សា បន ឧទកវារតោ មុត្តមត្តា វ វេគេន តំ ឃរំ គន្ត្វា កុហឹ មេ សហាយិកាតិ បុច្ឆិ ។ កុហឹ នំ បស្សិស្សសិ តស្សា ឥមស្មឹ ឋានេ ជាតទារកេ យក្ខិនី ខាទតិ តស្មា កុលគេហំ គតាតិ ។ សា យត្ថ វា តត្ថ វា គច្ឆតុ ន មេ មុច្ចិស្សតីតិ វេរវេគសមុស្សាហិតា នគរាភិមុខិនី បក្ខន្ទិ ។ ឥតរាបិ នាមគ្គហណទិវសេ តំ ទារកំ នហាបេត្វា នាមំ កត្វា សាមិ ឥទានិ សកឃរំ គច្ឆាមាតិ បុត្តំ អាទាយ សាមិកេន សទ្ធឹ វិហារមជ្ឈគតេន មគ្គេន គច្ឆន្តី បុត្តំ សាមិកស្ស ទត្វា វិហារបោក្ខរណិយំ នហាត្វា ឧត្តរិត្វា បុត្តំ គហេត្វា សាមិកេ នហាយន្តេ បុត្តំ បាយមានា ឋិតា យក្ខិនឹ អាគច្ឆន្តឹ ទិស្វា សញ្ជានិត្វា សាមិ វេគេន ឯហិ អយំ សា យក្ខិនីតិ ឧច្ចាសទ្ទំ កត្វា យាវ តស្សាគមនំ សណ្ឋាតុំ អសក្កោន្តី និវត្តិត្វា អន្តោវិហារាភិមុខិនី បក្ខន្ទិ ។
តស្មឹ សមយេ សត្ថា បរិសមជ្ឈេ ធម្មំ ទេសេតិ ។ សា បុត្តំ តថាគតស្ស បាទបិដ្ឋេ និបជ្ជាបេត្វា តុម្ហាកំ មយា ឯស ទិន្នោ បុត្តស្ស មេ ជីវិតំ ទេថាតិ អាហ ។ ទ្វារកោដ្ឋកេ អធិវត្ថោ សុមនទេវោ យក្ខិនិយា អន្តោ បវិសិតុំ នាទាសិ ។ សត្ថា អានន្ទត្ថេរំ អាមន្តេត្វា គច្ឆានន្ទ តំ យក្ខិនឹ បក្កោសាតិ អាហ ។ ថេរោ តំ បក្កោសិ ។ ឥតរា អយំ ភន្តេ អាគច្ឆតីតិ អាហ ។ សត្ថា ឯតុ មា សទ្ទំ អកាសីតិ វត្វា តំ អាគន្ត្វា ឋិតំ កស្មា ឯវំ ករោសិ សចេ ហិ តុម្ហេ មាទិសស្ស ពុទ្ធស្ស សម្មុខីភាវំ នាគមិស្សថ អហិនកុលានំ វិយ វេរំ អច្ឆផន្ទនានំ វិយ កាកោឡុកានំ វិយ ច កប្បដ្ឋិតិកំ វោ វេរំ អភវិស្ស កស្មា វេរបដិវេរំ ករោថ វេរំ ហិ អវេរេន ឧបសម្មតិ នោ វេរេនាតិ វត្វា ឥមំ គាថមាហ
ន ហិ វេរេន វេរានិ សម្មន្តីធ កុទាចនំ ។
អវេរេន ច សម្មន្តិ ឯស ធម្មោ សនន្តនោតិ ។
តត្ថ ន ហិ វេរេនាតិ យថា ហិ ខេឡសិង្ឃាណិកាទិអសុចិមក្ខិតដ្ឋានំ តេហេវ អសុចីហិ ធោវន្តោបិ សុទ្ធំ និគ្គន្ធំ កាតុំ ន សក្កោតិ អថខោ តំ ឋានំ ភិយ្យោសោ មត្តាយ អសុទ្ធតរញ្ច ទុគ្គន្ធតរញ្ច ហោតិ ឯវមេវ អក្កោសន្តំ បច្ចក្កោសន្តោ បហរន្តំ បដិប្បហរន្តោ វេរេន វេរំ វូបសមេតុំ ន សក្កោតិ អថខោ ភិយ្យោ ភិយ្យោ វេរមេវ ករោតិ ។ ឥតិ វេរានិ នាម វេរេន កិស្មិញ្ចិបិ កាលេ ន សម្មន្តិ អថខោ វឌ្ឍន្តិយេវ ។ អវេរេន ច សម្មន្តីតិ យថា បន តានិ ខេឡាទីនិ អសុចីនិ វិប្បសន្នេន ឧទកេន ធោវិយមានានិ វិនស្សន្តិ តំ ឋានំ សុទ្ធំ ហោតិ និគ្គន្ធំ ឯវមេវ អវេរេន ខន្តិមេត្តោទកេន យោនិសោមនសិការេន បច្ចវេក្ខណេន វេរានិ វូបសម្មន្តិ បដិប្បស្សម្ភន្តិ អភាវំ គច្ឆន្តិ ។ ឯស ធម្មោ សនន្តនោតិ ឯស អវេរេន វេរវូបសមនសង្ខាតោ បោរាណកោ ធម្មោ សព្វេសំ ពុទ្ធបច្ចេកពុទ្ធខីណាសវានំ គតមគ្គោតិ ។
គាថាបរិយោសានេ សា យក្ខីនី សោតាបត្តិផលេ បតិដ្ឋហិ ។ សម្បត្តបរិសាយបិ ទេសនា សាត្ថិកា អហោសិ ។
សត្ថា តំ ឥត្ថឹ អាហ ឯតិស្សា តវ បុត្តំ ទេហីតិ ។ ភាយាមិ ភន្តេតិ ។ មា ភាយិ នត្ថិ តេ ឯតំ និស្សាយ បរិបន្ថោតិ ។ សា បុត្តំ តស្សា អទាសិ ។ សា តំ គហេត្វា ចុម្ពិត្វា អាលិង្គិត្វា បុន មាតុយេវ ទត្វា រោទិតុំ អារភិ ។ អថ នំ សត្ថា កិមេតន្តិ បុច្ឆិ ។ ភន្តេ អហំ បុព្វេ យថា តថា ជីវិតំ កប្បេន្តីបិ កុច្ឆិបូរំ នាម នាលត្ថំ ឥទានិ កថំ ជីវិស្សាមីតិ ។ អថ នំ សត្ថា មា ចិន្តយីតិ សមស្សាសេត្វា តំ ឥត្ថឹ អាហ ឥមំ នេត្វា អត្តនោ គេហេ និវាសាបេត្វា អគ្គយាគុភត្តេហិ បដិជគ្គាហីតិ ។ សា តំ នេត្វា បិដ្ឋិវំសេ បតិដ្ឋាបេត្វា អគ្គយាគុភត្តេហិ បដិជគ្គិ ។ តស្សា វីហិបហរណកាលេ មុសលំ មុទ្ធំ បហរន្តំ វិយ ឧបដ្ឋាតិ ។ សា សហាយិកំ អាមន្តេត្វា ឥមស្មឹ ឋានេ វសិតុំ ន សក្ខិស្សាមិ អញ្ញត្ថ មំ បតិដ្ឋាបេហីតិ វត្វា មុសលសាលាយំ ឧទកចាដិយំ ឧទ្ធនេ និម្ពកោសេ សង្ការកូដេ គាមទ្វារេតិ ឯតេសុ ឋានេសុ បតិដ្ឋាបិតាបិ ឥធ មេ មុសលំ សីសំ ភិន្ទន្តំ វិយ ឧបដ្ឋាតិ ឥធ ទារកា ឧច្ឆិដ្ឋុទកំ ឱតារេន្តិ ឥធ សុនខា និបជ្ជន្តិ ឥធ ទារកា អសុចឹ ករោន្តិ ឥធ កចវរំ ឆឌ្ឌេន្តិ ឥធ គាមទារកា លក្ខយោគ្គំ ករោន្តីតិ សព្វានិ តានិ បដិក្ខិបិ ។ អថ នំ ពហិគាមេ វិវិត្តោកាសេ បតិដ្ឋាបេត្វា តត្ថ តស្សា អគ្គយាគុភត្តាទីនិ ហរិត្វា បដិជគ្គិ ។ សា យក្ខិនី ឯវំ ចិន្តេសិ អយំ មេ សហាយិកា ឥទានិ ពហូបការា ហន្ទាហំ កិញ្ចិ បដិគុណំ ករោមីតិ ឥមស្មឹ សំវច្ឆរេ សុព្វុដ្ឋិកា ភវិស្សតិ ថលដ្ឋានេ សស្សំ ករោហិ ឥមស្មឹ សំវច្ឆរេ ទុព្វុដ្ឋិកា ភវិស្សតិ និន្នដ្ឋានេយេវ សស្សំ ករោហីតិ សហាយិកាយ អារោចេសិ ។ សេសជនេហិ កតសស្សំ អច្ចុទកេន វា អនុទកេន វា នស្សតិ ។ តស្សា សស្សំ អតិវិយ សម្បជ្ជតិ ។ អថ នំ អម្ម តយា កតំ សស្សំ នេវ អច្ចោទកេន នស្សតិ ន អនោទកេន នស្សតិ សុព្វុដ្ឋិទុព្វុដ្ឋិភាវំ ញត្វា កម្មំ ករោសិ កឹ នុ ខោ ឯតន្តិ បុច្ឆឹសុ ។ អម្ហាកំ សហាយិកា យក្ខិនី សុព្វុដ្ឋិទុព្វុដ្ឋិភាវំ អាចិក្ខតិ មយំ តស្សា វចនេន ថលនិន្នេសុ សស្សានិ ករោម តេន នោ សស្សំ សម្បជ្ជតិ កឹ ន បស្សថ និពទ្ធំ អម្ហាកំ គេហតោ យាគុភត្តាទីនិ ហរិយមានានិ តានិ ឯតិស្សា ហរិយន្តិ តុម្ហេបិ ឯតិស្សា អគ្គយាគុភត្តាទីនិ ហរថ តុម្ហាកម្បិ កម្មន្តេ ឱលោកេស្សតីតិ ។ អថស្សា សកលនគរវាសិនោ សក្ការំ ករឹសុ ។ សាបិ តតោ បដ្ឋាយ សព្វេសំ កម្មន្តេ ឱលោកេន្តី លាភគ្គប្បត្តា អហោសិ មហាបរិវារា ។ សា អបរភាគេ អដ្ឋ សលាកភត្តានិ បដ្ឋបេសិ ។ តានិ យាវជ្ជកាលា ទីយន្តិយេវ ។
ឥទំ កាលីយក្ខិនិយា ឧប្បត្តិវត្ថុ ។
No comments:
Post a Comment