៣.តិស្សត្ថេរវត្ថុ
អក្កោច្ឆិ មំ អវធិ មន្តិ ឥមំ ធម្មទេសនំ សត្ថា ជេតវនេ វិហរន្តោ តិស្សត្ថេរំ អារព្ភ កថេសិ ។សោ កិរាយស្មា ភគវតោ បិតុច្ឆាបុត្តោ មហល្លកកាលេ បព្វជិតោ ពុទ្ធសាសនេ ឧប្បន្នំ លាភសក្ការំ បរិភុញ្ជន្តោ ថុល្លសរីរោ អាកោដិតបច្ចាកោដិតេហិ ចីវរេហិ យេភុយ្យេន វិហារមជ្ឈេ ឧបដ្ឋានសាលាយំ និសីទតិ ។ តថាគតស្ស ទស្សនត្ថាយ អាគតា អាគន្តុកា ភិក្ខូ ឯសោ មហាថេរោ ភវិស្សតីតិ សញ្ញាយ តស្ស សន្តិកំ គន្ត្វា វត្តំ អាបុច្ឆន្តិ បាទសម្ពាហនាទីនិ អាបុច្ឆន្តិ ។ សោ តុណ្ហី ហោតិ ។ អថ នំ ឯកោ ទហរភិក្ខុ កតិវស្សា តុម្ហេតិ បុច្ឆិត្វា វស្សំ នត្ថិ មហល្លកកាលេ បព្វជិតា មយន្តិ វុត្តេ អាវុសោ ទុព្វិនីត មហល្លក អត្តនោ បមាណំ ន ជានាសិ ឯត្តកេ មហល្លកត្ថេរេ ទិស្វា សាមីចិមត្តំបិ ន ករោសិ វត្តេ អាបុច្ឆិយមានេ តុណ្ហី ហោសិ កុក្កុច្ចមត្តំបិ តេ នត្ថីតិ អច្ឆរំ បហរិ ។ សោ ខត្តិយមានំ ជនេត្វា តុម្ហេ កស្ស សន្តិកំ អាគតាតិ បុច្ឆិត្វា សត្ថុ សន្តិកន្តិ វុត្តេ មំ បន កោ ឯសោតិ សល្លក្ខេថ មូលមេវ វោ ឆិន្ទិស្សាមីតិ វត្វា រុទន្តោ ទុក្ខី ទុម្មនោ សត្ថុ សន្តិកំ អគមាសិ ។ អថ នំ សត្ថា កិន្នុ ត្វំ តិស្ស ទុក្ខី ទុម្មនោ អស្សុមុខោ រុទមានោ អាគតោសីតិ បុច្ឆិ ។ តេបិ ភិក្ខូ ឯស គន្ត្វា កិញ្ចិ អាលុលិកំ ករេយ្យាតិ ចិន្តេត្វា តេនេវ សទ្ធឹ គន្ត្វា សត្ថារំ វន្ទិត្វា ឯកមន្តំ និសីទឹសុ ។ សោ សត្ថារា បុច្ឆិតោ ឥមេ មំ ភន្តេ ភិក្ខូ អក្កោសន្តីតិ អាហ ។ កហំ បន ត្វំ និសិន្នោសីតិ ។ វិហារមជ្ឈេ ឧបដ្ឋានសាលាយំ ភន្តេតិ ។ ឥមេ តេ ភិក្ខូ អាគច្ឆន្តា ទិដ្ឋាតិ ។ ទិដ្ឋា ភន្តេតិ ។ ឧដ្ឋាយ តេ បច្ចុគ្គមនំ កតន្តិ ។ ន កតំ ភន្តេតិ ។ តេសំ បរិក្ខារគ្គហណំ តេ អាបុច្ឆិតន្តិ ។ នាបុច្ឆិតំ ភន្តេតិ ។ វត្តំ វា បានីយំ វា អាបុច្ឆិតន្តិ ។ នាបុច្ឆិតំ ភន្តេតិ ។ អាសនំ អភិហរិត្វា បាទសម្ពាហនំ កតន្តិ ។ ន កតំ ភន្តេតិ ។ តិស្ស មហល្លកភិក្ខូនំ សព្វមេតំ វត្តំ កត្តព្វំ ឯតំ អករោន្តេន វិហារមជ្ឈេ និសីទិតុំ ន វដ្ដតិ តវេវ ទោសោ ឯតេ ភិក្ខូ ខមាបេហីតិ ។ ឯតេ មំ ភន្តេ អក្កោសឹសុ នាហំ ឯតេ ខមាបេមីតិ ។ តិស្ស មា ឯវំ ករិ តវេវ ទោសោ ខមាបេហិ នេតិ ។ ន ខមាបេមិ ភន្តេតិ ។ អថ សត្ថា ទុព្វចោ ឯស ភន្តេតិ ភិក្ខូហិ វុត្តេ ន ភិក្ខវេ ឥទានេវ បុព្វេបេស ទុព្វចោយេវាតិ វត្វា ឥទានិ តាវស្ស ភន្តេ ទុព្វចភាវោ អម្ហេហិ ញាតោ អតីតេ កិមកាលីតិ វុត្តេ តេនហិ ភិក្ខវេ សុណាថាតិ វត្វា អតីតំ អាហរិ
អតីតេ ពារាណសិយំ ពារាណសីរាជេ រជ្ជំ ការេន្តេ ទេវលោ នាម តាបសោ អដ្ឋ មាសេ ហិមវន្តេ វសិត្វា លោណម្ពិលសេវនត្ថាយ ចត្តារោ មាសេ នគរំ ឧបនិស្សាយ វសិតុកាមោ ហិមវន្តតោ អាគន្ត្វា នគរទ្វារបាលកេ ទិស្វា បុច្ឆិ ឥមំ នគរំ សម្បត្តបព្វជិតា កត្ថ វសន្តីតិ ។ កុម្ភការសាលាយំ ភន្តេតិ ។ សោ កុម្ភការសាលំ គន្ត្វា ទ្វារេ ឋត្វា សចេ តេ អគរុ វសេយ្យាម ឯករត្តឹ សាលាយន្តិ អាហ ។ កុម្ភការោ មយ្ហំ រត្តឹ សាលាយំ កិច្ចំ នត្ថិ មហតី សាលា យថាសុខំ វសថ ភន្តេតិ សាលំ និយ្យាទេសិ ។ តស្មឹ បវិសិត្វា និសិន្នេ អបរោបិ នារទោ នាម តាបសោ ហិមវន្តតោ អាគន្ត្វា កុម្ភការំ ឯករត្តិវាសំ យាចិ ។ កុម្ភការោ បឋមាគតោ ឥមិនា សទ្ធឹ ឯកតោ វសិតុកាមោ ភវេយ្យ វា នោ វា អត្តានំ បរិមោចេស្សាមីតិ ចិន្តេត្វា សចេ ភន្តេ បឋមុបគតោ រោចេស្សតិ តស្ស រុចិយា វសថាតិ អាហ ។ សោ តំ ឧបសង្កមិត្វា សចេ តេ អាចរិយ អគរុ មយមេត្ថ ឯករត្តឹ វសេយ្យាមាតិ ។ មហតី សាលា បវិសិត្វា ឯកមន្តេ វសាតិ វុត្តេ បវិសិត្វា បុរេតរំ បវិដ្ឋស្ស អបរភាគេ និសីទិ ។ ឧភោបិ សារាណីយំ កថំ កថេត្វា សយនកាលេ នារទោ ទេវលស្ស និបជ្ជនដ្ឋានញ្ច ទ្វារញ្ច សល្លក្ខេត្វា និបជ្ជិ ។ សោ បន ទេវលោ និបជ្ជមានោ អត្តនោ និសិន្នដ្ឋានេ អនិបជ្ជិត្វា ទ្វារមជ្ឈេ តិរិយំ និបជ្ជិ ។ នារទោ រត្តឹ និក្ខមន្តោ តស្ស ជដាសុ អក្កមិ ។ កោ មំ អក្កមីតិ វុត្តេ អាចរិយ អហន្តិ អាហ ។ កុដជដិល អរញ្ញតោ អាគន្ត្វា មម ជដាសុ អក្កមសីតិ ។ អាចរិយ តុម្ហាកំ ឥធ និបន្នភាវំ ន ជានាមិ ខមថ មេតិ វត្វា តស្ស កន្ទន្តស្សេវ ពហិ និក្ខមិ ។ ឥតរោ អយំ បវិសន្តោបិ មំ អក្កមេយ្យាតិ បរិវត្តេត្វា បាទដ្ឋានេ សីសំ កត្វា និបជ្ជិ ។ នារទោបិ បវិសន្តោ បឋមម្បាហំ អាចរិយេ អបរជ្ឈឹ ឥទានិស្ស បាទបស្សេន បវិសិស្សាមីតិ ចិន្តេត្វា អាគច្ឆន្តោ គីវាយ អក្កមិ កោ ឯសោតិ វុត្តេ អហំ អាចរិយាតិ វត្វា កុដជដិល បឋមំ ជដាសុ អក្កមិត្វា ឥទានិ គីវាយ អក្កមសិ អភិសបិស្សាមិ តន្តិ វុត្តេ អាចរិយ មយ្ហំ ទោសោ នត្ថិ អហំ តុម្ហាកំ ឯវំ និបន្នភាវំ ន ជានាមិ បឋមំបិ មេ អបរាធំ អត្ថិ ឥទានិ បាទបស្សេន បវិសិស្សាមីតិ បវិដ្ឋោម្ហិ ខមថ មេតិ អាហ ។ កុដជដិល អភិសបិស្សាមិ តន្តិ ។ មា ឯវំ អករិត្ថ អាចរិយាតិ ។ សោ តស្ស វចនំ អនាទយិត្វា
សហស្សរំសិ សតតេជោ សុរិយោ តមវិនោទនោ
បាតោ ឧទយន្តេ សុរិយេ មុទ្ធា តេ ផលតុ សត្តធាតិ
តំ អភិសបិយេវ ។ នារទោ អាចរិយ មយ្ហំ ទោសោ នត្ថិ មម វទន្តស្សេវ តុម្ហេ អភិសបិត្ថ យស្ស ទោសោ អត្ថិ តស្ស មុទ្ធា ផលតុ មា និទ្ទោសស្សាតិ វត្វា
សហស្សរំសិ សតតេជោ សុរិយោ តមវិនោទនោ
បាតោ ឧទយន្តេ សុរិយេ មុទ្ធា តេ ផលតុ សត្តធាតិ
អភិសបិ ។ សោ បន មហានុភាវោ អតីតេ ចត្តាឡីស អនាគតេ ចត្តាឡីសាតិ អសីតិកប្បេ អនុស្សរតិ តស្មា កស្ស នុ ខោ ឧបរិ សាបោ បតិស្សតីតិ ឧបធារេន្តោ អាចរិយស្សាតិ ញត្វា តស្មឹ អនុកម្បំ បដិច្ច ឥទ្ធិពលេន អរុណុគ្គមនំ និវារេសិ ។
នាគរា អរុណេ អនុគ្គច្ឆន្តេ រាជទ្វារំ គន្ត្វា ទេវ តយិ រជ្ជំ ការេន្តេ អរុណោ ន ឧដ្ឋាតិ អរុណំ នោ ឧដ្ឋាបេហីតិ កន្ទឹសុ ។ រាជា អត្តនោ កាយកម្មាទីនិ ឱលោកេន្តោ កិញ្ចិ អយុត្តំ អទិស្វា កឹ នុ ខោ ការណន្តិ ចិន្តេត្វា បព្វជិតានំ វិវាទេន ភវិតព្វន្តិ បរិសង្កមានោ កច្ចិ ឥមស្មឹ នគរេ បព្វជិតា អត្ថីតិ បុច្ឆិ ។ ហិយ្យោ សាយំ កុម្ភការសាលំ អាគតា អត្ថិ ទេវាតិ វុត្តេ តំខណញ្ញេវ រាជា ឧក្កាហិ ធារិយមានាហិ តត្ថ គន្ត្វា នារទំ វន្ទិត្វា ឯកមន្តំ និសិន្នោ អាហ
កម្មន្តា នប្បវត្តន្តិ ជម្ពូទីបស្ស នារទ
កេន លោកោ តមោភូតោ តំ មេ អក្ខាហិ បុច្ឆិតោតិ ។
នារទោ សព្វំ បវត្តឹ អាចិក្ខិត្វា ឥមិនា ការណេនាហំ ឥមិនា អភិសបិតោ អថាហំ មយ្ហំ ទោសោ នត្ថិ យស្ស ទោសោ អត្ថិ តស្សេវ ឧបរិ សាបោ បតតូតិ វត្វា អភិសបឹ អភិសបិត្វា ច បន កស្ស នុខោ ឧបរិ សាបោ បតិស្សតីតិ ឧបធារេន្តោ សុរិយុគ្គមនវេលាយ អាចរិយស្ស មុទ្ធា សត្តធា ផលិស្សតីតិ ទិស្វា ឯតស្មឹ អនុកម្បំ បដិច្ច អរុណស្ស ឧគ្គន្តុំ ន ទេមីតិ ។ កថំ បនស្ស ភន្តេ អន្តរាយោ ន ភវេយ្យាតិ ។ សចេ មំ ខមាបេយ្យ ន ភវេយ្យាតិ ។ តេនហិ ខមាបេហីតិ ។ ឯសោ មំ ជដាសុ ច គីវាយ ច អក្កមិ នាហំ ឯតំ កុដជដិលំ ខមាបេមីតិ ។ ខមាបេហិ ភន្តេ មា ឯវំ ករីតិ ។ ន ខមាបេមីតិ ។ មុទ្ធា តេ សត្តធា ផលិស្សតីតិ វុត្តេបិ ន ខមាបេសិយេវ ។ អថ នំ រាជា ន ត្វំ អត្តនោ រុចិយា ខមាបេស្សសីតិ ហត្ថបាទកុច្ឆិគីវាសុ តំ គាហាបេត្វា នារទស្ស បាទមូលេ ឱនមាបេសិ ។ នារទោ ឧដ្ឋេហិ អាចរិយ ខមាមិ តេតិ វត្វា មហារាជ នាយំ យថាមនេន ខមាបេតិ អវិទូរេ ឯកោ សរោ អត្ថិ តត្ថ នំ សីសេ មត្តិកាបិណ្ឌំ កត្វា គលប្បមាណេ ឧទកេ ឋបាបេហីតិ អាហ ។ រាជា តថា ការេសិ ។ នារទោ ទេវលំ អាមន្តេត្វា អាចរិយ មយា ឥទ្ធិយា វិស្សដ្ឋាយ សុរិយសន្តាបេ ឧដ្ឋហន្តេ ត្វំ ឧទកេ និមុជ្ជិត្វា អញ្ញេន ឋានេន ឧត្តរិត្វា គច្ឆេយ្យាសីតិ អាហ ។ តស្ស សុរិយរំសីហិ សម្ផុដ្ឋមត្តោវ មត្តិកាបិណ្ឌោ សត្តធា ផលិ ។ សោ និមុជ្ជិត្វា អញ្ញេន ឋានេន បលាយិ ។ សត្ថា ឥមំ ធម្មទេសនំ អាហរិត្វា តទា ភិក្ខវេ រាជា អានន្ទោ អហោសិ ទេវលោ តិស្សោ នារទោ អហមេវ ឯវំ តទាបេស ទុព្វចោយេវាតិ វត្វា តិស្សត្ថេរំ អាមន្តេត្វា តិស្ស ភិក្ខុនោ ហិ អសុកេនាហំ អក្កុដ្ឋោ អសុកេន បហដោ អសុកេន ជិតោ អសុកោ មេ ភណ្ឌំ អហាសីតិ ចិន្តេន្តស្ស វេរន្នាម ន វូបសម្មតិ ឯវំ បន អនុបនយ្ហន្តស្សេវ ឧបសម្មតីតិ វត្វា ឥមា គាថា អភាសិ
អក្កោច្ឆិ មំ អវធិ មំ អជិនិ មំ អហាសិ មេ
យេ ច តំ ឧបនយ្ហន្តិ វេរំ តេសំ ន សម្មតិ ។
អក្កោច្ឆិ មំ អវធិ មំ អជិនិ មំ អហាសិ មេ
យេ ច តំ នូបនយ្ហន្តិ វេរំ តេសូបសម្មតីតិ ។
តត្ថ អក្កោច្ឆីតិ អក្កោសិ ។ អវធីតិ បហរិ ។ អជិនីតិ កុដសក្ខឹ ឱតារណេន វា វាទប្បដិវាទេន វា ករណុត្តរិយករណេន វា មំ អជេសិ ។ អហាសីតិ មម សន្តកំ វត្ថាទីសុ យង្កិញ្ចិទេវ អវហរិ ។ យេ ច តន្តិ យេកេចិ ទេវា វា មនុស្សា វា គហដ្ឋា វា បព្វជិតា វា តំ អក្កោច្ឆិ មន្តិអាទិវត្ថុកំ កោធំ សកដធុរំ វិយ នទ្ធិនា បូតិមច្ឆាទីនិ វិយ ច កុសាទីហិ បុនប្បុនំ វេឋេន្តា ឧបនយ្ហន្តិ តេសំ សកឹ ឧប្បន្នំ វេរំ ន សម្មតិ ន ឧបសម្មតិ ។ យេ ច តំ នូបនយ្ហន្តីតិ អសតិអមនសិការវសេន វា កម្មបច្ចវេក្ខណវសេន វា យេ តំ អក្កោសាទិវត្ថុកំ កោធំ តយាបិ កោចិ និទ្ទោសោ បុរិមភវេ អក្កុដ្ឋោ ភវិស្សតិ បហដោ ភវិស្សតិ កូដសក្ខឹ ឱតារេត្វា ជិតោ ភវិស្សតិ កស្សចិ តេ បសយ្ហ កិញ្ចិ អច្ឆិន្នំ ភវិស្សតិ តស្មា និទ្ទោសោ ហុត្វាបិ អក្កោសាទីនិ បាបុណាសីតិ ឯវំ ន ឧបនយ្ហន្តិ តេសំ បមាទេន ឧប្បន្នម្បិ វេរំ ឥមិនា អនុបនយ្ហនេន និរិន្ធនោ វិយ ជាតវេទោ ឧបសម្មតីតិ ។
ទេសនាបរិយោសានេ សតសហស្សភិក្ខូ សោតាបត្តិផលាទីនិ បាបុណឹសុ ។ ធម្មទេសនា មហាជនស្ស សាត្ថិកា អហោសិ ។ ទុព្វចោបិ សុវចោ ជាតោតិ ។
តិស្សត្ថេរវត្ថុ ។
No comments:
Post a Comment