៥.កោសម្ពិកវត្ថុ
បរេ ច ន វិជានន្តីតិ ឥមំ ធម្មទេសនំ សត្ថា ជេតវនេ វិហរន្តោ កោសម្ពិកេ ភិក្ខូ អារព្ភ កថេសិ ។កោសម្ពិយំ ហិ ឃោសិតារាមេ បញ្ចសតបញ្ចសតបរិវារា ទេ្វ ភិក្ខូ វិហរឹសុ វិនយធរោ ច ធម្មកថិកោ ច ។ តេសុ ធម្មកថិកោ ឯកទិវសំ សរីរវលញ្ជំ កត្វា ឧទកកោដ្ឋកេ អាចមនឧទកាវសេសំ ភាជនេ ឋបេត្វា និក្ខមិ ។ បច្ឆា វិនយធរោ តត្ថ បវិដ្ឋោ តំ ឧទកំ ទិស្វា និក្ខមិត្វា ឥតរំ បុច្ឆិ អាវុសោ តយា ឧទកំ ឋបិតន្តិ ។ អាម អាវុសោតិ ។ កឹ បនេត្ថ អាបត្តិភាវំ ន ជានាសីតិ ។ អាម ន ជានាមីតិ ។ ហោតាវុសោ ឯត្ថ អាបត្តីតិ ។ តេនហិ បដិក្ករិស្សាមិ នន្តិ សចេ បន តេ អាវុសោ អសញ្ចិច្ច អសតិយា កតំ នត្ថិ អាបត្តីតិ ។ សោ តស្សា អាបត្តិយា អនាបត្តិទិដ្ឋិ អហោសិ ។ វិនយធរោបិ អត្តនោ និស្សិតកានំ អយំ ធម្មកថិកោ អាបត្តឹ អាបជ្ជមានោបិ ន ជានាតីតិ អារោចេសិ ។ តេ តស្ស និស្សិតកេ ទិស្វា តុម្ហាកំ ឧបជ្ឈាយោ អាបត្តឹ អាបជ្ជិត្វាបិ អាបត្តិភាវំ ន ជានាតីតិ អាហំសុ ។ តេ គន្ត្វា អត្តនោ ឧបជ្ឈាយស្ស អារោចេសុំ ។ សោ ឯវមាហ អយំ វិនយធរោ បុព្វេ អនាបត្តីតិ វត្វា ឥទានិ អាបត្តីតិ វទតិ មុសាវាទី ឯសោតិ ។ តេ គន្ត្វា តុម្ហាកំ ឧបជ្ឈាយោ មុសាវាទីតិ កថយឹសុ ។ តេ ឯវំ អញ្ញមញ្ញំ កលហំ វឌ្ឍយឹសុ ។ តតោ វិនយធរោ ឱកាសំ លភិត្វា ធម្មកថិកស្ស អាបត្តិយា អទស្សនេ ឧក្ខេបនីយកម្មំ អកាសិ ។ តតោ បដ្ឋាយ តេសំ បច្ចយទាយកា ឧបដ្ឋាកាបិ ទេ្វ កោដ្ឋាសា អហេសុំ ។ ឱវាទបដិគ្គាហិកា ភិក្ខុនិយោបិ អារក្ខទេវតាបិ តាសំ សន្ទិដ្ឋសម្ភត្តា អាកាសដ្ឋទេវតាបិ យាវ ព្រហ្មលោកាបិ សព្វេ បុថុជ្ជនា ទេ្វ បក្ខា អហេសុំ ។ យាវ អកនិដ្ឋភវនា បន ឯកនិន្នាទំ កោលាហលំ អគមាសិ ។
អថេកោ ភិក្ខុ តថាគតំ ឧបសង្កមិត្វា ឧក្ខេបកានំ ធម្មិកេនេវាយំ កម្មេន ឧក្ខិត្តោតិ លទ្ធឹ ឧក្ខិត្តានុវត្តកានំ អធម្មិកេន កម្មេន ឧក្ខិត្តោតិ លទ្ធឹ ឧក្ខេបកេហិ វារិយមានានំបិ ច តេសំ តំ អនុបរិវារេត្វា វិចរណភាវំ អារោចេសិ ។ ភគវា សមគ្គា កិរ ហោន្តូតិ ទេ្វ វារេ បេសេត្វា ន ឥច្ឆន្តិ ភន្តេ សមគ្គា ភវិតុន្តិ សុត្វា តតិយវារេ ភិន្នោ ភិក្ខុសង្ឃោ ភិន្នោ ភិក្ខុសង្ឃោតិ សុត្វា តេសំ សន្តិកំ គន្ត្វា ឧក្ខេបកានំ ឧក្ខេបនេ ឥតរេសញ្ច អាបត្តិយា អទស្សនេ អាទីនវំ កថេត្វា បុន តេសំ តត្ថេវ ឯកសីមាយំ ឧបោសថាទីនិ អនុជានិត្វា ភត្តគ្គាទីសុ ភណ្ឌនជាតានំ អាសនន្តរិកាយ និសីទិតព្វន្តិ ភត្តគ្គេ វត្តំ បញ្ញាបេត្វា ឥទានិបិ ភណ្ឌនជាតា វិហរន្តីតិ សុត្វា តត្ថ គន្ត្វា អលំ ភិក្ខវេ មា ភណ្ឌនន្តិអាទីនិ វត្វា ភិក្ខវេ ភណ្ឌនកលហវិគ្គហវិវាទា នាមេតេ អនត្ថការកា កលហំ និស្សាយ ហិ លដុកិកាបិ សកុណិកា ហត្ថិនាគំ ជីវិតក្ខយំ បាបេសីតិ លដុកិកជាតកំ កថេត្វា ភិក្ខវេ សមគ្គា ហោថ មា វិវទថ វិវាទំ និស្សាយ ហិ អនេកសហស្សវដ្ដកាបិ ជីវិតក្ខយំ បត្តាតិ វដ្ដកជាតកំ កថេសិ។
ឯវំបិ តេសុ វចនំ អនាទិយន្តេសុ អញ្ញតរេន ធម្មវាទិនា តថាគតស្ស វិហេសំ អនិច្ឆន្តេន អាគមេតុ ភន្តេ ភគវា ធម្មស្សាមិ អប្បោស្សុក្កោ ភន្តេ ភគវា ទិដ្ឋធម្មសុខវិហារំ អនុយុត្តោ វិហរតុ មយមេតេន ភណ្ឌនេន កលហេន វិគ្គហេន វិវាទេន បញ្ញាយិស្សាមាតិ វុត្តេ ភូតបុព្វំ ភិក្ខវេ ពារាណសិយំ ព្រហ្មទត្តោ នាម កាសីរាជា អហោសីតិ ព្រហ្មទត្តេន ទីឃីតិស្ស កោសលរញ្ញោ រជ្ជំ អច្ឆិន្ទិត្វា អញ្ញាតកវេសេន វសន្តស្ស មារិតភាវញ្ចេវ ទីឃាវុកុមារេន អត្តនោ ជីវិតេ ទិន្នេ តតោ បដ្ឋាយ តេសំ សមគ្គភាវញ្ច កថេត្វា តេសំ ហិ នាម ភិក្ខវេ រាជូនំ អាទិន្នទណ្ឌានំ អាទិន្នសត្ថានំ ឯវរូបំ ខន្តិសោរច្ចំ ភវិស្សតិ ឥធ ខោ តំ ភិក្ខវេ សោភេថ យំ តុម្ហេ ឯវំ ស្វាក្ខាតេ ធម្មវិនយេ បព្វជិតា សមានា ខមា ច ភវេយ្យាថ សោរតា ចាតិ ឱវទិត្វាបិ នេវ តេ សមគ្គេ កាតុំ អសក្ខិ ។
សោ តាយ អាកិណ្ណវិហារតាយ ឧក្កណ្ឋិតោ អហំ ខោ ឥទានិ អាកិណ្ណោ ទុក្ខំ វិហរាមិ ឥមេ ច ភិក្ខូ មម វចនំ ន ករោន្តិ យន្នូនាហំ ឯកោ គណម្ហា វូបកដ្ឋោ វិហរេយ្យន្តិ ចិន្តេត្វា កោសម្ពិយំ បិណ្ឌាយ ចរិត្វា អនបលោកេត្វា ភិក្ខុសង្ឃំ ឯកកោវ អត្តនោ បត្តចីវរមាទាយ ពាលកលោណការាមំ គន្ត្វា តត្ថ ភគុត្ថេរស្ស ឯកចារិកវត្តំ កថេត្វា បាចីនវំសមិគទាយេ តិណ្ណំ កុលបុត្តានំ សាមគ្គីរសានិសំសំ កថេត្វា យេន បារិលេយ្យកំ តទវសរិ ។ តត្រ សុទំ ភគវា បារិលេយ្យកំ ឧបនិស្សាយ រក្ខិតវនសណ្ឌេ ភទ្ទសាលមូលេ បារិលេយ្យកេន ហត្ថិនា ឧបដ្ឋិយមានោ ផាសុកំ វស្សាវាសំ វសិ ។
កោសម្ពីវាសិនោបិ ខោ ឧបាសកា វិហារំ គន្ត្វា សត្ថារំ អបស្សន្តា កុហឹ ភន្តេ សត្ថាតិ បុច្ឆឹសុ ។ តេ ភិក្ខូ អាហំសុ បារិលេយ្យកវនសណ្ឌំ គតោតិ ។ កឹការណា ភន្តេតិ ។ អម្ហេ សមគ្គេ កាតុំ វាយមិ មយំ បន ន សមគ្គា អហុម្ហាតិ ។ ភន្តេ តុម្ហេ សត្ថុ សន្តិកេ បព្វជិត្វា តស្មឹ សាមគ្គឹ ករោន្តេបិ សមគ្គា ន អហុវត្ថាតិ ។ ឯវមាវុសោតិ ។ មនុស្សា ឥមេ សត្ថុ សន្តិកេ បព្វជិត្វា តស្មឹ សាមគ្គឹ ករោន្តេបិ សមគ្គា ន ជាតា មយំ ឥមេ និស្សាយ សត្ថារំ ទដ្ឋុំ ន លភិម្ហា ឥមេសំ នេវ អាសនំ ទស្សាម ន អភិវាទនាទីនិ ករិស្សាមាតិ តតោ បដ្ឋាយ តេសំ សាមីចិមត្តកំបិ ន ករឹសុ ។ តេ អប្បាហារតាយ សុស្សមានា កតិបាហេនេវ ឧជុកា ហុត្វា អញ្ញមញ្ញំ អច្ចយំ ទេសេត្វា ខមាបេត្វា ឧបាសកា មយំ សមគ្គា ជាតា តុម្ហេបិ នោ បុរិមសទិសាវ ហោថាតិ អាហំសុ ។ ខមាបិតោ បន វោ ភន្តេ សត្ថាតិ ។ ន ខមាបិតោ អាវុសោតិ ។ តេនហិ សត្ថារំ ខមាបេថ សត្ថុ ខមាបិតកាលេ មយំបិ តុម្ហាកំ បុរិមសទិសា ភវិស្សាមាតិ ។ តេ អន្តោវស្សភាវេន សត្ថុ សន្តិកំ គន្តុំ អវិសហន្តា ទុក្ខេន តំ អន្តោវស្សំ វីតិនាមេសុំ ។
សត្ថា បន តេន ហត្ថិនា ឧបដ្ឋិយមានោ សុខំ វសិ ។ សោបិ គណំ បហាយ ផាសុវិហារត្ថាយ តំ វនសណ្ឌំ បាវិសិ ។ យថាហ អហំ ខោ អាកិណ្ណោ វិហរាមិ ហត្ថីហិ ហត្ថិនីហិ ហត្ថិកលភេហិ ហត្ថិច្ឆាបេហិ ឆិន្នគ្គានិ ចេវ តិណានិ ខាទាមិ ឱភគ្គោភគ្គញ្ច មេ សាខាភង្គំ ខាទន្តិ អាវិលានិ ច បានីយានិ បិវាមិ ឱគាហន្តស្ស មេ ឧត្តិណ្ណស្ស ហត្ថិនិយោ កាយំ ឧបនិឃំសន្តិយោ គច្ឆន្តិ យន្នូនាហំ ឯកោ គណម្ហា វូបកដ្ឋោ វិហរេយ្យន្តិ ។ អថខោ សោ ហត្ថិនាគោ យូថា អបក្កម្ម យេន បារិលេយ្យកំ រក្ខិតវនសណ្ឌោ ភទ្ទសាលមូលំ យេន ភគវា តេនុបសង្កមិ ឧបសង្កមិត្វា ច បន ភគវន្តំ វន្ទិត្វា ឱលោកេន្តោ អញ្ញំ កិញ្ចិ អទិស្វា ភទ្ទសាលមូលំ បាទេន បហរន្តោ តច្ឆេត្វា សោណ្ឌាយ សាខំ គហេត្វា សម្មជ្ជិ តតោ បដ្ឋាយ សោណ្ឌាយ ឃដំ គហេត្វា បានីយំ បរិភោជនីយំ ឧបដ្ឋបេតិ ឧណ្ហោទកេន អត្ថេ សតិ ឧណ្ហោទកំ បដិយាទេតិ ។ កថំ ហត្ថេន កដ្ឋានិ ឃំសិត្វា អគ្គឹ សម្បាទេតិ តំ ទារូនិ បក្ខិបន្តោ ជាលេត្វា តត្ថ បាសាណេ បចិត្វា ទារុទណ្ឌកេន បវដ្ដេត្វា បរិច្ឆិន្នាយ ខុទ្ទកសោណ្ឌិយំ ខិបតិ តតោ ហត្ថំ ឱតារេត្វា ឧទកស្ស តត្តភាវំ ជានិត្វា គន្ត្វា សត្ថារំ វន្ទតិ ។ សត្ថា ឧទកំ តេ តាបិតំ បារិលេយ្យកាតិ វត្វា តត្ថ គន្ត្វា នហាយតិ ។ អថស្ស នានាវិធានិ ផលានិ អាហរិត្វា ទេតិ ។ យទា បន សត្ថា គាមំ បិណ្ឌាយ បវិសតិ តទា សត្ថុ បត្តចីវរមាទាយ កុម្ភេ បតិដ្ឋាបេត្វា សត្ថារា សទ្ធឹយេវ គច្ឆតិ ។ សត្ថា គាមូបចារំ បត្វា បារិលេយ្យក ឥតោ បដ្ឋាយ តយា គន្តុំ ន សក្កា អាហរ មេ បត្តចីវរន្តិ អាហរាបេត្វា គាមំ បិណ្ឌាយ បវិសតិ ។ សោបិ យាវ សត្ថុ និក្ខមនា តត្ថេវ ឋត្វា សត្ថុ អាគមនកាលេ បច្ចុគ្គមនំ កត្វា បុរិមនយេនេវ បត្តចីវរំ គហេត្វា វសនដ្ឋានេ ឱតារេត្វា វត្តំ ទស្សេត្វា សាខាយ វីជតិ រត្តឹ វាលមិគបរិបន្ថនិវារណត្ថំ មហន្តំ ទណ្ឌំ សោណ្ឌាយ គហេត្វា សត្ថារំ រក្ខិស្សាមីតិ យាវ អរុណុគ្គមនា វនសណ្ឌស្ស អន្តរន្តរេ វិចរតិ ។ តតោ បដ្ឋាយយេវ កិរ សោ វនសណ្ឌោ រក្ខិតវនសណ្ឌោ នាម ជាតោ ។ អរុណេ ឧគ្គតេ មុខោទកទានំ អាទឹ កត្វា តេនេវ ឧបាយេន សព្វវត្តានិ ករោតិ ។
កថេកោ មក្កដោ តំ ហត្ថឹ ឧដ្ឋាយ សមុដ្ឋាយ តថាគតស្ស អភិសមាចារិកំ ករោន្តំ ទិស្វា អហំបិ កិញ្ចិទេវ ករិស្សាមីតិ វិចរន្តោ ឯកទិវសំ និម្មក្ខិកំ ទណ្ឌកមធុបដលំ ទិស្វា ទណ្ឌកំ ភញ្ជិត្វា ទណ្ឌកេនេវ សទ្ធឹ មធុបដលំ សត្ថុ សន្តិកំ ហរិត្វា កទលិបត្តំ ឆិន្ទិត្វា តត្ថ ឋបេត្វា អទាសិ ។ សត្ថា គណ្ហិ ។ មក្កដោ ករិស្សតិ នុ ខោ បរិភោគំ ន ករិស្សតីតិ ឱលោកេន្តោ គហេត្វា និសិន្នំ ទិស្វា កឹ នុ ខោតិ ចិន្តេត្វា ទណ្ឌកោដឹ គហេត្វា បរិវត្តេត្វា ឧបធារេន្តោ អណ្ឌកានិ ទិស្វា តានិ សណិកំ អបនេត្វា បុន អទាសិ ។ សត្ថា បរិភោគមកាសិ ។ សោ តុដ្ឋមានសោ តំ តំ សាខំ គហេត្វា នច្ចន្តោ អដ្ឋាសិ ។ អថស្ស គហិតសាខាបិ អក្កន្តសាខាបិ ភិជ្ជិ ។ សោ ឯកស្មឹ ខាណុមត្ថកេ បតិត្វា និព្វិទ្ធគត្តោ បសន្នេនេវ ចិត្តេន កាលំ កត្វា តាវតឹសភវនេ តឹសយោជនិកេ កនកវិមានេ និព្វត្តិ អច្ឆរាសហស្សបរិវារោ អហោសិ ។
តថាគតស្ស តត្ថ ហត្ថិនាគេន ឧបដ្ឋិយមានស្ស វសនភាវោ សកលជម្ពុទីបេ បាកដោ អហោសិ ។ សាវត្ថីនគរតោ អនាថបិណ្ឌិកោ វិសាខា មហាឧបាសិកាតិ ឯវមាទីនិ មហាកុលានិ អានន្ទត្ថេរស្ស សាសនំ បហិណឹសុ សត្ថារំ នោ ភន្តេ ទស្សេថាតិ ។ ទិសាវាសិនោបិ បញ្ចសតា ភិក្ខូ វុត្ថវស្សា អានន្ទត្ថេរំ ឧបសង្កមិត្វា ចិរស្សុតា នោ អាវុសោ អានន្ទ ភគវតោ សម្មុខា ធម្មីកថា សាធុ មយំ អាវុសោ អានន្ទ លភេយ្យាម ភគវតោ សម្មុខា ធម្មីកថំ សវនាយាតិ យាចឹសុ ។ ថេរោ តេ ភិក្ខូ អាទាយ តត្ថ គន្ត្វា តេមាសំ ឯកវិហារិនោ តថាគតស្ស សន្តិកំ ឯត្តកេហិ ភិក្ខូហិ សទ្ធឹ ឧបសង្កមិតុំ អយុត្តន្តិ ចិន្តេត្វា តេ ភិក្ខូ ពហិ ឋបេត្វា ឯកកោវ សត្ថារំ ឧបសង្កមិ ។ បារិលេយ្យកោ តំ ទិស្វា ទណ្ឌកំ អាទាយ បក្ខន្ទិ ។ សត្ថា ឱលោកេត្វា អបេហិ បារិលេយ្យក មា និវារយិ ពុទ្ធុបដ្ឋាកោ ឯសោតិ អាហ ។ សោ តត្ថេវ ទណ្ឌំ ឆឌ្ឌេត្វា បត្តចីវរបដិគ្គហណំ អាបុច្ឆិ ។ ថេរោ នាទាសិ ។ នាគោ សចេ ឧគ្គហិតវត្តោ ភវិស្សតិ សត្ថុ និសីទនបាសាណផលកេ អត្តនោ បរិក្ខារំ ន ឋបេស្សតីតិ ចិន្តេសិ ។ ថេរោ បត្តចីវរំ ភូមិយំ ឋបេសិ ។ វត្តសម្បន្នា ហិ គរូនំ អាសនេ វា សយនេ វា អត្តនោ បរិក្ខារំ ន ឋបេន្តិ សោ តំ ទិស្វា បសន្នចិត្តោ អហោសិ ។ ថេរោ សត្ថារំ វន្ទិត្វា ឯកមន្តំ និសីទិ ។ សត្ថា អានន្ទ ឯកកោវ អាគតោសីតិ បុច្ឆិត្វា បញ្ចសតេហិ ភិក្ខូហិ សទ្ធឹ អាគតភាវំ សុត្វា កុហឹ បន តេតិ វត្វា តុម្ហាកំ ចិត្តំ អជានន្តោ ពហិ ឋបេត្វា អាគតោម្ហីតិ វុត្តេ បក្កោសាហិ តេតិ អាហ ។ ថេរោ តថា អកាសិ ។ តេ ភិក្ខូ អាគន្ត្វា សត្ថារំ វន្ទិត្វា ឯកមន្តំ និសីទឹសុ ។ សត្ថា តេហិ សទ្ធឹ បដិសន្ថារំ កត្វា តេហិ ភិក្ខូហិ ភន្តេ ភគវា ពុទ្ធសុខុមាលោ ចេវ ខត្តិយសុខុមាលោ ច តុម្ហេហិ តេមាសំ ឯកកេហិ តិដ្ឋន្តេហិ និសីទន្តេហិ ច ទុក្ករំ កតំ វត្តបដិវត្តការកោបិ មុខោទកទាយកោបិ នាហោសិ មញ្ញេតិ វុត្តេ ភិក្ខវេ បារិលេយ្យកហត្ថិនា មម សព្វកិច្ចានិ កតានិ ឯវរូបំ ហិ សហាយកំ លភន្តេន ឯកតោ វសិតុំ យុត្តំ អលភន្តស្ស ឯកចារិកភាវោវ សេយ្យោតិ វត្វា ឥមា នាគវគ្គេ តិស្សោ គាថាយោ អភាសិ
សចេ លភេថ និបកំ សហាយំ
សទ្ធឹចរំ សាធុវិហារិ ធីរំ
អភិភុយ្យ សព្វានិ បរិស្សយានិ
ចរេយ្យ តេនត្តមនោ សតីមា
នោ ចេ លភេថ និបកំ សហាយំ
សទ្ធឹចរំ សាធុវិហារិ ធីរំ
រាជាវ រដ្ឋំ វិជិតំ បហាយ
ឯកោ ចរេ មាតង្គរញ្ញេវ នាគោ
ឯកស្ស ចរិតំ សេយ្យោ នត្ថិ ពាលេ សហាយតា
ឯកោ ចរេ ន ច បាបានិ កយិរា
អប្បោស្សុក្កោ មាតង្គរញ្ញេវ នាគោតិ ។
គាថាបរិយោសានេ បញ្ចសតាបិ តេ ភិក្ខូ អរហត្តេ បតិដ្ឋហឹសុ ។ អានន្ទត្ថេរោ អនាថបិណ្ឌិកាទីហិ បេសិតំ សាសនំ អារោចេត្វា ភន្តេ អនាថបិណ្ឌិកបមុខា បញ្ច អរិយសាវកកោដិយោ តុម្ហាកំ អាគមនំ បច្ចាសឹសន្តីតិ អាហ ។ សត្ថា តេនហិ គណ្ហាហិ បត្តចីវរន្តិ បត្តចីវរំ គាហាបេត្វា និក្ខមិ ។ នាគោ គន្ត្វា មគ្គេ តិរិយំ អដ្ឋាសិ ។ ភិក្ខូ តំ ទិស្វា ភគវន្តំ បុច្ឆឹសុ កឹ ករោតិ ភន្តេតិ ។ តុម្ហាកំ ភិក្ខវេ ភិក្ខំ ទាតុំ បច្ចាសឹសតិ ទីឃរត្តំ ខោ បនាយំ មយ្ហំ ឧបការកោ នាស្ស ចិត្តំ កោបេតុំ វដ្ដតិ និវត្តថ ភិក្ខវេតិ ។ សត្ថា ភិក្ខូ គហេត្វា និវត្តិ ។ ហត្ថីបិ វនសណ្ឌំ បវិសិត្វា បនសកទលិផលាទីនិ នានាផលានិ សំហរិត្វា រាសឹ កត្វា បុនទិវសេ ភិក្ខូនំ អទាសិ ។ បញ្ចសតា ភិក្ខូ សព្វានិ ខេបេតុំ នាសក្ខឹសុ ។ ភត្តកិច្ចបរិយោសានេ សត្ថា បត្តចីវរំ គហេត្វា និក្ខមិ ។ នាគោ ភិក្ខូនំ អន្តរន្តរេន គន្ត្វា សត្ថុ បុរតោ តិរិយំ អដ្ឋាសិ ។ ភិក្ខូ តំ ទិស្វា ភគវន្តំ បុច្ឆឹសុ កឹ ករោតិ ភន្តេតិ ។ អយំ ភិក្ខវេ តុម្ហេ បេសេត្វា មំ និវត្តេតីតិ ។ ឯវំ ភន្តេតិ ។ អាម ភិក្ខវេតិ ។ អថ នំ សត្ថា បារិលេយ្យក ឥទំ មម អនិវត្តគមនំ តវ ឥមិនា អត្តភាវេន ឈានំ វា វិបស្សនំ វា មគ្គផលំ វា នត្ថិ តិដ្ឋ ត្វន្តិ អាហ ។ តំ សុត្វា នាគោ មុខេ សោណ្ឌំ បក្ខិបិត្វា រោទន្តោ បច្ឆតោ បច្ឆតោ អគមាសិ ។ សោ ហិ សត្ថារំ និវត្តេតុំ លភន្តោ តេនេវ និយាមេន យាវជីវំ បដិជគ្គេយ្យ ។ សត្ថា បន តំ គាមូបចារំ បត្វា បារិលេយ្យក ឥតោ បដ្ឋាយ តវ អភូមិ មនុស្សាវាសោ សបរិបន្ថោ តិដ្ឋ ត្វន្តិ អាហ ។ សោ រោទមានោ តត្ថ ឋត្វា សត្ថរិ ចក្ខុបថំ វិជហន្តេ ហទយេន ផលិតេន កាលំ កត្វា សត្ថរិ បសាទេន តាវតឹសភវនេ តឹសយោជនិកេ កនកវិមានេ អច្ឆរាសហស្សមជ្ឈេ និព្វត្តិ ។ បារិលេយ្យកទេវបុត្តោតេ្វវស្ស នាមំ អហោសិ ។ សត្ថាបិ អនុបុព្វេន ជេតវនំ អគមាសិ ។
កោសម្ពិកា ភិក្ខូ សត្ថា កិរ សាវត្ថឹ អាគតោតិ សុត្វា សត្ថារំ ខមាបេតុំ តត្ថ អគមំសុ ។ កោសលរាជា តេ កិរ កោសម្ពិកា ភណ្ឌនការកា ភិក្ខូ អាគច្ឆន្តីតិ សុត្វា សត្ថារំ ឧបសង្កមិត្វា អហំ ភន្តេ តេសំ មម វិជិតំ បវិសិតុំ ន ទស្សាមីតិ អាហ ។ មហារាជ សីលវន្តា តេ ភិក្ខូ កេវលំ អញ្ញមញ្ញំ វិវាទេន មម វចនំ ន គណ្ហឹសុ ឥទានិ មំ ខមាបេតុំ អាគច្ឆន្តិ អាគច្ឆន្តុ មហារាជាតិ ។ អនាថបិណ្ឌិកោបិ ភន្តេ អហំ តេសំ វិហារំ បវិសិតុំ ន ទស្សាមីតិ វត្វា តថេវ ភគវតា បដិក្ខិត្តោ តុណ្ហី អហោសិ ។ សាវត្ថិយំ អនុប្បត្តានំ បន តេសំ ភគវា ឯកមន្តេ វិវិត្តំ ការាបេត្វា សេនាសនំ ទាបេសិ ។ អញ្ញេ ភិក្ខូ តេហិ សទ្ធឹ នេវ ឯកតោ និសីទន្តិ ន តិដ្ឋន្តិ ។ អាគតាគតា សត្ថារំ បុច្ឆន្តិ កតមេ តេ ភន្តេ ភណ្ឌនការកា កោសម្ពិកា ភិក្ខូតិ ។ សត្ថា ឯតេតិ ទស្សេតិ ។ តេ ឯតេ កិរ តេ ឯតេ កិរ តេតិ អាគតាគតេហិ អង្គុលិយា ទស្សិយមានា លជ្ជាយ សីសំ ឧក្ខិបិតុំ អសក្កោន្តា ភគវតោ បាទមូលេ និបជ្ជិត្វា ភគវន្តំ ខមាបេសុំ ។ សត្ថា ភារិយំ វោ ភិក្ខវេ កតំ តុម្ហេ នាម មាទិសស្ស ពុទ្ធស្ស សន្តិកេ បព្វជិត្វាបិ មយិ សាមគ្គឹ ករោន្តេ មម វចនំ ន ករិត្ថ បោរាណកបណ្ឌិតាបិ វជ្ឈប្បត្តានំ មាតាបិតូនំ ឱវាទំ សុត្វា តេសុ ជីវិតា វោរោបិយមានេសុបិ តំ អនតិក្កមិត្វា បច្ឆា ទ្វីសុ រដ្ឋេសុ រជ្ជំ ការយឹសូតិ វត្វា បុនទេវ ទីឃាវុកុមារជាតកំ កថេត្វា ឯវំ ភិក្ខវេ ទីឃាវុកុមារោ មាតាបិតូសុ ជីវិតា វោរោបិយមានេសុបិ តេសំ ឱវាទំ អនតិក្កមិត្វា បច្ឆា ព្រហ្មទត្តស្ស ធីតរំ លភិត្វា ទ្វីសុ កាសិកោសលរដ្ឋេសុ រជ្ជំ ការេសិ តុម្ហេហិ បន មម វចនំ អករោន្តេហិ ភារិយំ កតន្តិ វត្វា ឥមំ គាថមាហ
បរេ ច ន វិជានន្តិ មយមេត្ថ យមាម សេ
យេ ច តត្ថ វិជានន្តិ តតោ សម្មន្តិ មេធគាតិ ។
តត្ថ បរេតិ បណ្ឌិតេ ឋបេត្វា តតោ អញ្ញេ ភណ្ឌនការកា បរេ នាម ។ តេ តត្ថ សង្ឃមជ្ឈេ កោលាហលំ ករោន្តា មយំ យមាម សេ ឧបរមាម នស្សាម សសតំ សមីបំ មច្ចុសន្តិកំ គច្ឆាមាតិ ន វិជានន្តិ ។ យេ ច តត្ថ វិជានន្តីតិ យេ តត្ថ បណ្ឌិតា មយំ មច្ចុសមីបំ គច្ឆាមាតិ វិជានន្តិ ។ តតោ សម្មន្តិ មេធគាតិ ឯវំ ហិ តេ ជានន្តា យោនិសោមនសិការំ ឧប្បាទេត្វា មេធគានំ កលហានំ វូបសមាយ បដិបជ្ជន្តិ អថ តេសំ តាយ បដិបត្តិយា តេ មេធគា សម្មន្តិ ។ អថវា បរេ ចាតិ បុព្វេ មយា មា ភិក្ខវេ ភណ្ឌនន្តិអាទីនិ វត្វា ឱវទិយមានាបិ មម ឱវាទស្ស អបដិគ្គហណេន អមាមកា បរេ នាម មយំ ឆន្ទាទិវសេន មិច្ឆាគាហំ គហេត្វា ឯត្ថ សង្ឃមជ្ឈេ យមាមសេ ភណ្ឌនាទីនំ វុឌ្ឍិយា វាយមាមាតិ ន វិជានន្តិ ។ ឥទានិ បន យោនិសោ បច្ចវេក្ខមានា តត្ថ តុម្ហាកំ អន្តរេ យេ បណ្ឌិតបុរិសា បុព្វេ មយំ ឆន្ទាទិវសេន វាយមន្តា អយោនិសោ បដិបន្នាតិ វិជានន្តិ តតោ តេសំ សន្តិកា តេ បណ្ឌិតបុរិសេ និស្សាយ ឥមេទានិ កលហសង្ខាតា មេធគា សម្មន្តីតិ អយមេត្ថ អត្ថោតិ ។ គាថាបរិយោសានេ សម្បត្តភិក្ខូ សោតាបត្តិផលាទីសុ បតិដ្ឋហឹសូតិ ។
កោសម្ពិកវត្ថុ ។
No comments:
Post a Comment