១.យមកវគ្គវណ្ណនា
១.ចក្ខុបាលត្ថេរវត្ថុ.
មនោបុព្វង្គមា ធម្មា មនោសេដ្ឋា មនោមយាមនសា ចេ បទុដ្ឋេន ភាសតិ វា ករោតិ វា
តតោ នំ ទុក្ខមនេ្វតិ ចក្កំវ វហតោ បទន្តិ ។
អយំ ធម្មទេសនា កត្ថ ភាសិតាតិ ។ សាវត្ថិយំ ។ កំ អារព្ភាតិ ។ ចក្ខុបាលត្ថេរំ ។
សាវត្ថិយំ កិរ មហាសុវណ្ណោ នាម កុដុម្ពិកោ អហោសិ អឌ្ឍោ មហទ្ធនោ មហាភោគោ អបុត្តកោ ។ សោ ឯកទិវសំ នហានតិត្ថំ គន្ត្វា នហាត្វា អាគច្ឆន្តោ អន្តរាមគ្គេ សម្បន្នសាខំ ឯកំ វនប្បតឹ ទិស្វា អយំ មហេសក្ខាយ ទេវតាយ បរិគ្គហិតោ ភវិស្សតីតិ តស្ស ហេដ្ឋាភាគំ សោធាបេត្វា បាការបរិក្ខេបំ ការាបេត្វា វាលុកំ ឱកិរាបេត្វា ធជបតាកំ ឧស្សាបេត្វា វនប្បតឹ អលង្ករិត្វា បុត្តំ វា ធីតរំ វា លភិត្វា តុម្ហាកំ មហាសក្ការំ ករិស្សាមីតិ បត្ថនំ កត្វា បក្កាមិ ។
អថស្ស ភរិយាយ កុច្ឆិយំ គព្ភោ បតិដ្ឋាសិ ។ សោ តស្សា គព្ភបរិហារំ អទាសិ ។ សា ទសមាសច្ចយេន បុត្តំ វិជាយិ ។ សេដ្ឋី អត្តនា បាលិតំ វនប្បតឹ និស្សាយ លទ្ធត្តា តស្ស បាលោតិ នាមំ អកាសិ ។ អបរភាគេ អញ្ញំ បុត្តំ លភិ ។ តស្ស ចុល្លបាលោតិ នាមំ កត្វា ឥតរស្ស មហាបាលោតិ នាមំ ករិ ។ តេ វយប្បត្តេ ឃរពន្ធនេន ពន្ធឹសុ ។ អបរភាគេ មាតាបិតរោ កាលមកំសុ ។ សព្វំ ភោគំ ទ្វិន្នំយេវ វិវរេសុំ ។
តស្មឹ សមយេ សត្ថា បវត្តិតបវរធម្មចក្កោ អនុបុព្វេន គន្ត្វា អនាថបិណ្ឌិកមហាសេដ្ឋិនា ចតុប្បញ្ញាសកោដិធនំ វិស្សជ្ជេត្វា ការិតេ ជេតវនមហាវិហារេ វិហរតិ មហាជនំ សគ្គមគ្គេ ច មោក្ខមគ្គេ ច បតិដ្ឋាបយមានោ ។ តថាគតោ ហិ មាតិបក្ខតោ អសីតិយា បិតិបក្ខតោ អសីតិយាតិ ទេ្វអសីតិញាតិកុលសហស្សេហិ ការិតេ និគោ្រធមហាវិហារេ ឯកមេវ វស្សាវាសំ វសិ អនាថបិណ្ឌិកេន ការិតេ ជេតវនមហាវិហារេ ឯកូនវីសតិ វិសាខាយ សត្តវីសតិកោដិធនបរិច្ចាគេន ការិតេ បុព្វារាមេ ឆ វស្សាវាសេតិ ទ្វិន្នំ កុលានំ គុណមហន្តតំ បដិច្ច សាវត្ថឹ និស្សាយ បញ្ចវីសតិ វស្សាវាសេ វសិ ។ អនាថបិណ្ឌិកោបិ វិសាខាបិ មហាឧបាសិកា និពទ្ធំ ទិវសស្ស ទេ្វ វារេ តថាគតស្ស ឧបដ្ឋានំ គច្ឆន្តិ ។ គច្ឆន្តា ច ទហរសាមណេរា នោ ហត្ថេ ឱលោកេស្សន្តីតិ តុច្ឆហត្ថា ន គតបុព្វា បុរេភត្តំ គច្ឆន្តា ខាទនីយាទីនិ គាហាបេត្វា គច្ឆន្តិ បច្ឆាភត្តំ បញ្ច ភេសជ្ជានិ អដ្ឋ ច បានានិ ។ និវេសនេសុ បន តេសំ ទ្វិន្នំ ទ្វិន្នំ ភិក្ខុសហស្សានំ និច្ចំ បញ្ញត្តានេវាសនានិ ហោន្តិ ។ អន្នបានភេសជ្ជេសុ យោ យំ ឥច្ឆតិ តស្ស តំ យថិច្ឆិតមេវ សម្បជ្ជតិ តេសុ អនាថបិណ្ឌិកេន ឯកមេវ ទិវសំ សត្ថារំ បញ្ហោ ន បុច្ឆិតបុព្វោ ។ សោ កិរ តថាគតោ ពុទ្ធសុខុមាលោ ខត្តិយសុខុមាលោ ពហុបការោ មេ គហបតីតិ មយ្ហំ ធម្មំ ទេសេន្តោ កិលមេយ្យាតិ សត្ថរិ អធិមត្តសិនេហេន បញ្ហំ ន បុច្ឆតិ ។ សត្ថា បន តស្មឹ និសិន្នមត្តេយេវ អយំ សេដ្ឋី មំ អរក្ខិតព្វដ្ឋានេ រក្ខតិ អហំ ហិ កប្បសតសហស្សាធិកានិ ចត្តារិ អសង្ខេយ្យានិ អលង្កតប្បដិយត្តំ អត្តនោ សីសំ ឆិន្ទិត្វា អក្ខីនិ ឧប្បាដេត្វា ហទយមំសំ ឧព្វត្តេត្វា បាណសមំ បុត្តទារំ បរិច្ចជិត្វា បារមិយោ បូរេន្តោ បរេសំ ធម្មទេសនត្ថមេវ បូរេសឹ ឯស មំ អរក្ខិតព្វដ្ឋានេ រក្ខតីតិ ឯកំ ធម្មទេសនំ កថេសិយេវ ។
តទា សាវត្ថិយំ សត្ត មនុស្សកោដិយោ វសន្តិ ។ តេសុ សត្ថុ ធម្មកថំ សុត្វា បញ្ចកោដិមត្តា មនុស្សា អរិយសាវកា ជាតា ទេ្វកោដិមត្តា បុថុជ្ជនា ។ តេសុ អរិយសាវកានំ ទេ្វយេវ កិច្ចានិ អហេសុំ បុរេភត្តំ ទានំ ទេន្តិ បច្ឆាភត្តំ គន្ធមាលាទិហត្ថា វត្ថភេសជ្ជបានកាទឹ គាហាបេត្វា ធម្មស្សវនត្ថាយ គច្ឆន្តិ ។
អថេកទិវសំ មហាបាលោ អរិយសាវកេ គន្ធមាលាទិហត្ថេ វិហារំ គច្ឆន្តេ ទិស្វា អយំ មហាជនោ កុហឹ គច្ឆតីតិ បុច្ឆិត្វា ធម្មស្សវនាយាតិ សុត្វា អហំបិ គមិស្សាមីតិ គន្ត្វា សត្ថារំ វន្ទិត្វា បរិសបរិយន្តេ និសីទិ ។
ពុទ្ធា ច នាម ធម្មំ ទេសេន្តា សរណសីលបព្វជ្ជាទីនំ ឧបនិស្សយំ ឱលោកេត្វា អជ្ឈាសយវសេន ធម្មំ ទេសេន្តិ តស្មា តំទិវសំ សត្ថា តស្ស ឧបនិស្សយំ ឱលោកេត្វា ធម្មំ ទេសេន្តោ អនុបុព្វីកថំ កថេសិ ។ សេយ្យថីទំ ទានកថំ សីលកថំ សគ្គកថំ កាមានំ អាទីនវំ ឱការំ សង្កិលេសំ នេក្ខម្មេ អានិសំសំ បកាសេសិ ។ តំ សុត្វា មហាបាលោ កុដុម្ពិកោ ចិន្តេសិ បរលោកំ គច្ឆន្តំ បុត្តធីតរោ វា ភោគា វា នានុគច្ឆន្តិ សរីរំបិ អត្តនា សទ្ធឹ ន គច្ឆតិ កឹ មេ ឃរាវាសេន បព្វជិស្សាមីតិ ។ សោ ទេសនាបរិយោសានេ សត្ថារំ ឧបសង្កមិត្វា បព្វជ្ជំ យាចិ ។ អថ នំ សត្ថា នត្ថិ តេ កោចិ អាបុច្ឆិតព្វយុត្តកោ ញាតីតិ អាហ ។ កនិដ្ឋភាតា មេ អត្ថិ ភន្តេតិ ។ តេនហិ តំ អាបុច្ឆាហីតិ ។ សោ សាធូតិ សម្បដិច្ឆិត្វា សត្ថារំ វន្ទិត្វា គេហំ គន្ត្វា កនិដ្ឋំ បក្កោសាបេត្វា តាត យំ ឥមស្មឹ កុលេ សវិញ្ញាណកាវិញ្ញាណកំ ធនំ កិញ្ចិ អត្ថិ សព្វន្តំ តវ ភារោ បដិបជ្ជាហិ នន្តិ ។ តុម្ហេ បន សាមីតិ ។ អហំ សត្ថុ សន្តិកេ បព្វជិស្សាមីតិ ។ កឹ កថេសិ ភាតិក ត្វំ មេ មាតរិ មតាយ មាតា វិយ បិតរិ មតេ បិតា វិយ លទ្ធោ គេហេ វោ មហាវិភវោ សក្កា គេហំ អជ្ឈាវសន្តេហេវ បុញ្ញានិ កាតុំ មា ឯវមកត្ថាតិ ។ តាត មយា សត្ថុ ធម្មទេសនា សុតា សត្ថារា ហិ សណ្ហសុខុមំ តិលក្ខណំ អារោបេត្វា អាទិមជ្ឈបរិយោសានកល្យាណធម្មោ ទេសិតោ ។ ន សក្កា សោ អគារមជ្ឈេ បូរេតុំ បព្វជិស្សាមិ តាតាតិ ។ ភាតិក តរុណាបិច តាវ មហល្លកកាលេ បព្វជិស្សថាតិ ។ តាត មហល្លកស្ស ហិ អត្តនោ ហត្ថបាទាបិ អនស្សវា ហោន្តិ ន វសេ វត្តន្តិ កិមង្គំ បន ញាតកា ស្វាហំ តវ វចនំ ន ករោមិ សមណបដិបត្តឹ បូរេស្សាមិ
ជរាជជ្ជរិតា ហោន្តិ ហត្ថបាទា អនស្សវា
យស្ស សោ វិហតត្ថាមោ កថំ ធម្មំ ចរិស្សតិ
បព្វជិស្សាមេវាហំ តាតាតិ ។ តស្ស វិរវន្តស្សេវ សត្ថុ សន្តិកំ គន្ត្វា បព្វជ្ជំ យាចិត្វា លទ្ធបព្វជ្ជូបសម្បទោ អាចរិយុបជ្ឈាយានំ សន្តិកេ បញ្ច វស្សានិ វសិត្វា វុត្ថវស្សោ បវារេត្វា សត្ថារំ ឧបសង្កមិត្វា វន្ទិត្វា បុច្ឆិ ភន្តេ ឥមស្មឹ សាសនេ កតិ ធុរានីតិ ។ គន្ថធុរំ វិបស្សនាធុរន្តិ ទេ្វយេវ ធុរានិ ភិក្ខូតិ ។ កតមំ បន ភន្តេ គន្ថធុរំ កតមំ វិបស្សនាធុរន្តិ ។ អត្តនោ បញ្ញានុរូបេន ឯកំ វា ទេ្វ វា និកាយេ សកលំ វា បន តេបិដកំ ពុទ្ធវចនំ ឧគ្គណ្ហិត្វា តស្ស ធារណំ កថនំ វាចនន្តិ ឥទំ គន្ថធុរំ នាម ។ សល្លហុកវុត្តិនោ បន បន្តសេនាសនាភិរតស្ស អត្តភាវេ ខយវយំ បដ្ឋបេត្វា សាតច្ចកិរិយាវសេន វិបស្សនំ វឌ្ឍេត្វា អរហត្តគ្គហណន្តិ ឥទំ វិបស្សនាធុរំ នាមាតិ ។ ភន្តេ អហំ មហល្លកកាលេ បព្វជិតោ គន្ថធុរំ បូរេតុំ ន សក្ខិស្សាមិ វិបស្សនាធុរំ បន បូរេស្សាមិ កម្មដ្ឋានំ មេ កថេថាតិ ។ អថស្ស សត្ថា យាវ អរហត្តា កម្មដ្ឋានំ កថេសិ ។ សោ សត្ថារំ វន្ទិត្វា អត្តនា សហគាមិនោ ភិក្ខូ បរិយេសន្តោ សដ្ឋី ភិក្ខូ លភិត្វា តេហិ សទ្ធឹ និក្ខមិត្វា វីសយោជនសតមគ្គំ គន្ត្វា ឯកំ មហន្តំ បច្ចន្តគាមំ បត្វា តត្ថ សបរិវារោ បិណ្ឌាយ បាវិសិ ។
មនុស្សា វត្តសម្បន្នេ ភិក្ខូ ទិស្វា បសន្នចិត្តា អាសនានិ បញ្ញាបេត្វា និសីទាបេត្វា បណីតេនាហារេន បរិវិសិត្វា ភន្តេ កុហឹ អយ្យា គច្ឆន្តីតិ បុច្ឆិត្វា យថាផាសុកដ្ឋានំ ឧបាសកាតិ វុត្តេ បណ្ឌិតមនុស្សា វស្សាវាសំ សេនាសនំ បរិយេសន្តិ ភទន្តាតិ ញត្វា ភន្តេ សចេ អយ្យា ឥមំ តេមាសំ ឥធ វសេយ្យុំ មយំ សរណេសុ បតិដ្ឋាយ សីលានិ គណ្ហេយ្យាមាតិ អាហំសុ ។ តេបិ មយំ ឥមានិ កុលានិ និស្សាយ ភវនិស្សរណំ ករិស្សាមាតិ អធិវាសេសុំ ។ មនុស្សា តេសំ បដិញ្ញំ គហេត្វា វិហារំ បដិជគ្គិត្វា រត្តិដ្ឋានទិវាដ្ឋានានិ សម្បាទេត្វា អទំសុ ។ តេ និពទ្ធំ តមេវ គាមំ បិណ្ឌាយ បវិសន្តិ ។ អថ នេ ឯកោ វេជ្ជោ ឧបសង្កមិត្វា ភន្តេ ពហុន្នំ វសនដ្ឋានេ អផាសុកំបិ នាម ហោតិ តស្មឹ ឧប្បន្នេ មយ្ហំ កថេយ្យាថ ភេសជ្ជំ ករិស្សាមីតិ បវារេសិ ។
ថេរោ វស្សូបនាយិកាទិវសេ តេ ភិក្ខូ អាមន្តេត្វា បុច្ឆិ អាវុសោ ឥមំ តេមាសំ កតីហិ ឥរិយាបថេហិ វីតិនាមេស្សថាតិ ។ ចតូហិ ភន្តេតិ ។ កឹ បនេតំ អាវុសោ បដិរូបំ ននុ អប្បមត្តេហិ ភវិតព្វំ មយំ ហិ ធរមានស្ស ពុទ្ធស្ស សន្តិកា កម្មដ្ឋានំ គហេត្វា អាគតា ពុទ្ធា ច នាម ន សក្កា សឋេន អារាធេតុំ កល្យាណជ្ឈាសយេន ហេតេ អារាធេតព្វា បមត្តស្ស ច នាម ចត្តារោ អបាយា សកគេហសទិសា អប្បមត្តា ហោថាវុសោតិ ។ តុម្ហេ បន ភន្តេតិ ។ អហំ តីហិ ឥរិយាបថេហិ វីតិនាមេស្សាមិ បិដ្ឋឹ ន បសារេស្សាមិ អាវុសោតិ ។ សាធុ ភន្តេ អប្បមត្តា ហោថាតិ ។
ថេរស្ស និទ្ទំ អនោក្កមន្តស្ស បឋមមាសេ អតិក្កន្តេ អក្ខិរោគោ ឧប្បជ្ជិ ។ ឆិទ្ទឃដតោ ឧទកធារា វិយ អក្ខីហិ ធារា បគ្ឃរន្តិ ។ សោ សព្វរត្តឹ សមណធម្មំ កត្វា អរុណុគ្គមនេ គព្ភំ បវិសិត្វា និសីទិ ។ ភិក្ខូ ភិក្ខាចារវេលាយ ថេរស្ស សន្តិកំ គន្ត្វា ភិក្ខាចារវេលា ភន្តេតិ អាហំសុ ។ តេនហាវុសោ គណ្ហថ បត្តចីវរន្តិ អត្តនោ បត្តចីវរំ គាហាបេត្វា និក្ខមិ ។ ភិក្ខូ តស្ស អក្ខី បគ្ឃរន្តេ ទិស្វា កិមេតំ ភន្តេតិ បុច្ឆឹសុ ។ អក្ខី មេ អាវុសោ វាតា វិជ្ឈន្តីតិ ។ ននុ ភន្តេ វេជ្ជេនម្ហ បវារិតា តស្ស កថេយ្យាមាតិ ។ សាធាវុសោតិ ។ តេ វេជ្ជស្ស កថយឹសុ ។ សោ តេលំ បចិត្វា បេសេសិ ។ ថេរោ នាសាយ តេលំ អាសិញ្ចន្តោ និសិន្នកោវ អាសិញ្ចិត្វា អន្តោគាមំ បាវិសិ ។ វេជ្ជោ ទិស្វា អាហ ភន្តេ អយ្យស្ស កិរ អក្ខី វាតោ វិជ្ឈតីតិ ។ អាម ឧបាសកាតិ ។ ភន្តេ មយា តេលំ បចិត្វា បេសិតំ នាសាយ វោ អាសិត្តន្តិ ។ អាម ឧបាសកាតិ ។ ឥទានិ កីទិសន្តិ ។ រុជតេវ ឧបាសកាតិ ។ វេជ្ជោ មយា ឯកវារេនេវ វូបសមនត្ថំ តេលំ បហិតំ កិន្នុ ខោ រោគោ ន វូបសន្តោតិ ចិន្តេត្វា ភន្តេ និសីទិត្វា វោ អាសិត្តំ និបជ្ជិត្វាតិ បុច្ឆិ ។ ថេរោ តុណ្ហី អហោសិ បុនប្បុនំ បុច្ឆិយមានោបិ ន កថេសិ ។ សោ វិហារំ គន្ត្វា វសនដ្ឋានំ ឱលោកេស្សាមីតិ ចិន្តេត្វា តេនហិ ភន្តេ គច្ឆថាតិ ថេរំ វិស្សជ្ជេត្វា វិហារំ គន្ត្វា ថេរស្ស វសនដ្ឋានំ ឱលោកេន្តោ ចង្កមននិសីទនដ្ឋានមេវ ទិស្វា សយនដ្ឋានំ អទិស្វា ភន្តេ និសិន្នេហិ វោ អាសិត្តំ និប្បន្នេហីតិ បុច្ឆិ ។ ថេរោ តុណ្ហី អហោសិ ។ មា ភន្តេ ឯវមកត្ថ សមណធម្មោ នាម សរីរេ យាបេន្តេ សក្កា កាតុំ និបជ្ជិត្វា អាសិញ្ចថាតិ បុនប្បុនំ យាចិ ។ គច្ឆាវុសោ មន្តេត្វា ជានិស្សាមីតិ ។ ថេរស្ស ច តត្ថ នេវ ញាតី ន សាលោហិតា អត្ថិ កេន សទ្ធឹ មន្តេយ្យ ករជកាយេន បន សទ្ធឹ មន្តេន្តោ វទេហិ តាវ អាវុសោ បាលិត កឹ អក្ខី ឱលោកេស្សសិ ឧទាហុ ពុទ្ធសាសនំ អនមតគ្គស្មឹ ហិ សំសារវដ្ដេ តវ អក្ខិកាណស្ស គណនា នត្ថិ អនេកានិ បន ពុទ្ធសតានិ ពុទ្ធសហស្សានិ អតីតានិ តេសុ ឯកពុទ្ធោបិ ន បរិច្ឆិន្នោ ឥទានិ ឥមំ អន្តោវស្សំ តយោ មាសេ ន និបជ្ជិស្សាមីតិ តេ មានសំ ពទ្ធំ តស្មា ចក្ខូនិ តេ នស្សន្តុ វា ភិជ្ជន្តុ វា ពុទ្ធសាសនមេវ ធារេហិ មា ចក្ខូនីតិ ភូតកាយំ ឱវទន្តោ ឥមា គាថា អភាសិ
ចក្ខូនិ ហាយន្តុ មមាយិតានិ
សោតានិ ហាយន្តុ តថេវ ទេហោ
សព្វម្បិទំ ហាយតុ ទេហនិស្សិតំ
កឹការណា បាលិត ត្វំ បមជ្ជសិ ។
ចក្ខូនិ ជីរន្តុ មមាយិតានិ
សោតានិ ជីរន្តុ តថេវ កាយោ
សព្វម្បិទំ ជីរតុ កាយនិស្សិតំ
កឹការណា បាលិត ត្វំ បមជ្ជសិ ។
ចក្ខូនិ ភិជ្ជន្តុ មមាយិតានិ
សោតានិ ភិជ្ជន្តុ តថេវ រូបំ
សព្វម្បិទំ ភិជ្ជតុ រូបនិស្សិតំ
កឹការណា បាលិត ត្វំ បមជ្ជសីតិ ។
ឯវំ តីហិ គាថាហិ អត្តនោ ឱវាទំ ទត្វា និសិន្នកោ វ នត្ថុកម្មំ កត្វា គាមំ បិណ្ឌាយ បាវិសិ ។ វេជ្ជោ ទិស្វា កឹ ភន្តេ នត្ថុកម្មំ កតន្តិ បុច្ឆិ ។ អាម ឧបាសកាតិ ។ កីទិសំ ភន្តេតិ ។ រុជតេវ ឧបាសកាតិ ។ និសីទិត្វា វោ ភន្តេ កតំ និបជ្ជិត្វាតិ ។ ថេរោ តុណ្ហី អហោសិ បុនប្បុនំ បុច្ឆិតោបិ ន្ កិញ្ចិ កថេសិ ។ អថ នំ វេជ្ជោ ភន្តេ តុម្ហេ សប្បាយំ ន ករោថ អជ្ជ បដ្ឋាយ អសុកេន មេ តេលំ បក្កន្តិ មា វទិត្ថ អហំបិ មយា វោ តេលំ បក្កន្តិ ន វក្ខាមីតិ អាហ ។ សោ វេជ្ជេន បច្ចក្ខាតោ វិហារំ គន្ត្វា វេជ្ជេនាបិ បច្ចក្ខាតោសិ ឥរិយាបថំ មា វិស្សជ្ជិ សមណាតិ
បដិក្ខិត្តោ តិកិច្ឆាយ វេជ្ជេនាសិ វិវជ្ជិតោ
និយតោ មច្ចុរាជស្ស កឹ បាលិត បមជ្ជសីតិ
ឥមាយ គាថាយ អត្តានំ ឱវទិត្វា សមណធម្មំ អកាសិ ។ អថស្ស មជ្ឈិមយាមេ អតិក្កន្តមត្តេ អបុព្វំ អចរិមំ អក្ខីនិ ចេវ កិលេសា ច បភិជ្ជឹសុ ។ សោ សុក្ខវិបស្សកោ អរហា ហុត្វា គព្ភំ បវិសិត្វា និសីទិ ។ ភិក្ខូ ភិក្ខាចារវេលាយ គន្ត្វា ភិក្ខាចារកាលោ ភន្តេតិ អាហំសុ ។ កាលោ អាវុសោតិ ។ អាម ភន្តេតិ ។ តេនហិ គច្ឆថាតិ ។ តុម្ហេ បន ភន្តេតិ ។ អក្ខីនិ មេ អាវុសោ បរិហីនានីតិ ។ តេ តស្ស អក្ខីនិ ឱលោកេត្វា អស្សុបុណ្ណនេត្តា ហុត្វា ភន្តេ មា ចិន្តយិត្ថ មយំ វោ បដិជគ្គិស្សាមាតិ ថេរំ អស្សាសេត្វា កត្តព្វយុត្តកំ វត្តបដិវត្តំ កត្វា គាមំ បវិសឹសុ ។ មនុស្សា ថេរំ អទិស្វា ភន្តេ អម្ហាកំ អយ្យោ កុហិន្តិ បុច្ឆិត្វា តំ បវត្តឹ សុត្វា យាគុំ បេសេត្វា សយំ បិណ្ឌបាតំ អាទាយ គន្ត្វា ថេរំ វន្ទិត្វា បាទមូលេ បវដ្ដមានា រោទិត្វា មយំ ភន្តេ បដិជគ្គិស្សាម តុម្ហេ មា ចិន្តយិត្ថាតិ សមស្សាសេត្វា បក្កមឹសុ ។ តតោ បដ្ឋាយ និពទ្ធំ យាគុភត្តំ វិហារមេវ បេសេន្តិ ។ ថេរោបិ ឥតរេ សដ្ឋិភិក្ខូ និរន្តរំ ឱវទតិ ។ តេ តស្សោវាទេ ឋត្វា ឧបក្កដ្ឋាយ បវារណាយ សព្វេវ សហ បដិសម្ភិទាហិ អរហត្តំ បាបុណឹសុ វុត្ថវស្សា ច បន សត្ថារំ ទដ្ឋុកាមា ហុត្វា ថេរំ អាហំសុ ភន្តេ សត្ថារំ ទដ្ឋុកាមម្ហាតិ ។ ថេរោ តេសំ វចនំ សុត្វា ចិន្តេសិ អហំ ទុព្វលោ អន្តរាមគ្គេ ច អមនុស្សបរិគ្គហិតា អដវី អត្ថិ មយិ ឯតេហិ សទ្ធឹ គច្ឆន្តេ សព្វេ កិលមិស្សន្តិ ភិក្ខំបិ លភិតុំ ន សក្ខិស្សន្តិ ឥមេ បុរេតរមេវ បេសេស្សាមីតិ ។ អថ នេ អាហ អាវុសោ តុម្ហេ បុរតោ គច្ឆថាតិ ។ តុម្ហេ បន ភន្តេតិ ។ អហំ ទុព្វលោ អន្តរាមគ្គេ ច អមនុស្សបរិគ្គហិតា អដវី អត្ថិ មយិ តុម្ហេហិ សទ្ធឹ គច្ឆន្តេ សព្វេ កិលមិស្សថ តុម្ហេ បុរតោ គច្ឆថាតិ ។ មា ភន្តេ ឯវំ ករិត្ថ មយំ តុម្ហេហិ សទ្ធឹយេវ គមិស្សាមាតិ ។ មា វោ អាវុសោ ឯវំ រុច្ចិត្ថ ឯវំ សន្តេ មយ្ហំ អផាសុកំ ភវិស្សតិ មយ្ហំ កនិដ្ឋោ តុម្ហេ ទិស្វា បុច្ឆិស្សតិ អថស្ស មម ចក្ខូនំ បរិហីនភាវំ អារោចេយ្យាថ សោ មយ្ហំ សន្តិកំ កញ្ចិទេវ បហិណិស្សតិ តេន សទ្ធឹ អាគច្ឆិស្សាមិ តុម្ហេ មម វចនេន ទសពលញ្ច អសីតិមហាថេរេ ច វន្ទថាតិ តេ ឧយ្យោជេសិ ។ តេ ថេរំ ខមាបេត្វា អន្តោគាមំ បវិសឹសុ ។ មនុស្សា តេ និសីទាបេត្វា ភិក្ខំ ទត្វា កឹ ភន្តេ អយ្យានំ គមនាការោ បញ្ញាយតីតិ ។ អាម ឧបាសកា សត្ថារំ ទដ្ឋុកាមម្ហាតិ ។ តេ បុនប្បុនំ យាចិត្វា តេសំ គមនឆន្ទមេវ ញត្វា អនុគន្ត្វា បរិទេវិត្វា និវត្តឹសុ ។ តេបិ អនុបុព្វេន ជេតវនំ គន្ត្វា សត្ថារញ្ច មហាថេរេ ច ថេរស្ស វចនេន វន្ទិត្វា បុនទិវសេ យត្ថ ថេរស្ស កនិដ្ឋោ វសតិ តំ វីថឹ បិណ្ឌាយ បវិសឹសុ ។ កុដុម្ពិកោ តេ សញ្ជានិត្វា និសីទាបេត្វា កតបដិសន្ថារោ ភាតិកត្ថេរោ មេ កុហិន្តិ បុច្ឆិ ។ អថស្ស តេ តំ បវត្តឹ អារោចេសុំ ។ សោ តេសំ បាទមូលេ បវដ្ដេន្តោ រោទិត្វា បុច្ឆិ ឥទានិ ភន្តេ កឹ កាតព្វន្តិ ។ ថេរោ ឥតោ កស្សចិ គមនំ បច្ចាសឹសតិ គតកាលេ តេន សទ្ធឹ អាគមិស្សតីតិ ។ អយំ មេ ភន្តេ ភាគិនេយ្យោ បាលិតោ នាម ឯតំ បេសេថាតិ ។ ឯវំ បេសេតុំ ន សក្កា មគ្គេ បរិបន្ថោ អត្ថិ បព្វាជេត្វា បេសេតុំ វដ្ដតីតិ ។ ឯវំ កត្វា បេសេថ ភន្តេតិ ។ អថ នំ បព្វាជេត្វា អឌ្ឍមាសមត្តំ ចីវរគ្គហណាទីនិ សិក្ខាបេត្វា មគ្គំ អាចិក្ខិត្វា បហិណឹសុ ។ សោ អនុបុព្វេន តំ គាមំ បត្វា គាមទ្វារេ ឯកំ មហល្លកំ ទិស្វា ឥមំ គាមំ និស្សាយ កោចិ អារញ្ញកោ វិហារោ អត្ថីតិ បុច្ឆិ ។ អត្ថិ ភន្តេតិ ។ កោ តត្ថ វសតីតិ ។ បាលិតត្ថេរោ នាម ភន្តេតិ ។ មគ្គំ មេ អាចិក្ខថាតិ ។ កោសិ ត្វំ ភន្តេតិ ។ ថេរស្ស ភាគិនេយ្យោម្ហីតិ ។ អថ នំ គហេត្វា វិហារំ នេសិ ។ សោ ថេរំ វន្ទិត្វា អឌ្ឍមាសមត្តំ វត្តបដិវត្តំ កត្វា ថេរំ សម្មា បដិជគ្គិត្វា ភន្តេ មាតុលកុដុម្ពិកោ មេ តុម្ហាកំ អាគមនំ បច្ចាសឹសតិ ឯថ គច្ឆាមាតិ អាហ ។ តេនហិ មេ យដ្ឋិកោដឹ គណ្ហាហីតិ ។ សោ យដ្ឋិកោដឹ គហេត្វា ថេរេន សទ្ធឹ អន្តោគាមំ បាវិសិ ។ មនុស្សា ថេរំ និសីទាបេត្វា កឹ ភន្តេ គមនាការោ វោ បញ្ញាយតីតិ បុច្ឆឹសុ ។ អាម ឧបាសកា គន្ត្វា សត្ថារំ វន្ទិស្សាមីតិ ។ តេ នានប្បការេន យាចិត្វា អលភន្តា ថេរំ ឧយ្យោជេន្តា ឧបឌ្ឍបថំ គន្ត្វា រោទិត្វា និវត្តឹសុ ។ សាមណេរោ ថេរំ យដ្ឋិកោដិយា អាទាយ គច្ឆន្តោ អន្តរាមគ្គេ អដវិយំ សង្កដ្ឋនគរំ នាម ថេរេន ឧបនិស្សាយ វុត្ថបុព្វគាមំ សម្បាបុណិ ។ សោ តតោ និក្ខមិត្វា អរញ្ញេ គាយិត្វា ទារូនិ ឧទ្ធរន្តិយា ឯកិស្សា ឥត្ថិយា គីតសទ្ទំ សុត្វា សរេ និមិត្តំ គណ្ហិ ។
No comments:
Post a Comment